我 ê 詩
。
自畫像
寫詩
我是看人食燒būe竭得，也來逗鬧熱。我ê細胞無夠敏睿，不是看着一隻尾蝶死去着會傷心甲泪洒滴；嘛不是當着一葉焦葉仔沰落地，着會寂寞kah beh死去ê人。學人寫詩，全靠直覺，惊仔無夠甜、無夠鹹，būe薟būe臭、būe苦būe澀，不敢講是詩，所以講是親象「詩 ê 詩」。有一可仔是我少年時ê回憶，「放浪ê詩」着是我青春時為着白色恐怖佮失業ê痛苦，四過流浪，南北而路走ê遙遠記憶。有一可仔是生活上ê感受；雖然老耄啦，不佫老皮役無夠厚，若互蚊仔虰着，猶會感覺痛，所以加痛寫出來呤呤 。論年紀，我是LKK，算寫詩，我是幼稚園。台語寫詩，這倁我猶佇流浪ê年代，kānnā會使得偷偷仔寫，būe使得吟出聲；kānnā寫hō偕己看，不敢提hō別人看，今仔宛然是le做夢。
