台譯台灣紀略

林謙光 台灣紀略 加註台語翻譯

形勢

台灣是一個海上孤島，dīh東旁遠遠 ê 所在，地形親像一支彎弓，中央是台灣市，市外四周攏是海。逶台灣市僦北直到淡水、雞籠城，靠近福建，東旁是大琉球，離台灣比福建卡遠。逶台灣市落南到加洛堂、郎橋盡碰。西旁是小琉球，佮東港相對。逶中部入去，是一遍平洋，三十外里，山嶺青翠，樹木真菼，茲着是台灣港澳 ê 所在。港澳外，役有沙洲，呼做崑身，逶大崑身起到七崑身為止，一起一落，親像龍蛇相連。

台灣 ê 門戶dīh 北線尾 ê 鹿耳門，大線頭佮海翁窟是台灣城 ê 外圍塀，船舶往來攏經過鹿耳門出入，現在有設關 le 查驗。

【註】：

台灣 ê 位置dīh東經一一九點一八三度到一二二點六一五度，北緯二一點四五二五度到二五點三七五三度，攏總有大小七十九個海島，其中台灣本島最大；一塊若蕃薯。本紀略所講 ê 台灣市是現在 ê 台南市，凸出dīh嘉南平原 ê 南端。

大琉球是現在 ê 琉球群島，dīh台灣 ê 東北角，最南端ê與那國島離宜蘭約 80公里，比福建卡近。

嘉南平原延伸嘉雲南三縣，自二層行溪到濁水溪，南北一百外公里、東西五六十公里。

「崑身」、現在寫做「鯤鯓」，一鯤鯓dīh現在 ê 安平彼搭仔，「大線頭」，應該寫做「大汕頭」，佮海翁窟攏dīh一鯤鯓。

鯤鯓是「儒艮」，外文名叫dugong，俗名叫做「南戇」或「海南戇」，一般誤解叫而是海尪。

沿革

早前，有日本人dīh北線尾搭寮仔 le 做生理，也有盜賊倁遐出入 le 損澢中國沿海。後來，對爪哇來 ê 紅毛番是和蘭人，kā 日本人借地，煞加以佔去，企安平、赤嵌二個城，靠伊有夾板船，爻相戰，自安呢各社 ê 頭目攏着聽伊約束、受伊 ê 管轄。安平城外開一個市le hō 來往 ê 生理人做交易。

直到壬辰年(1649)，歸紅毛人已經三十外冬，有漢人郭櫰一謀反，紅毛人召集平埔族人kā 伊擒捉，掠去赤嵌樓頂殺死，自安呢起平埔族仇恨漢人，常常 hō 平埔族人殺死，煞漸漸恐怖起來。

辛丑年 (1659)、鄭成功自長江戰敗，四過漂泊，無地tāng去，拄有流民使唆伊去台灣，自安呢發動大小船千外隻，派何斌引港對鹿耳門來，拄當着滿潮，海水忽然漲県數尺，好勢登陸，紅毛人戰敗，逃入安平城，守蹛城內不出戰，鄭軍徇海岸加以封鎖規若個月，柴米、菜蔬攏佅得入去，又佫無後援，荷蘭人才突圍遁走返去。

鄭成功 kā 台灣改叫做東都，劃做一府二縣，設立府尹 kah 天興萬年二縣。一六六二年五月初八，鄭成功死亡，提督馬信擁護成功 ê 親小弟鄭世襲，改年號呼制護理。仝年十月，鄭成功尹子鄭經對廈門來， kah 世襲發生奪權傾拼，世襲戰輸下台，ziah 由鄭經接位。隔囀年，鄭經命令翁天祐做轉運使，委任國家政務，家己去蹛 le 廈門，dīh 廈門大興土木，建築街坊廟宇，現在 ê 新街佮橫街着是鄭經開創 ê 。

一六六四年，廈門失守，鄭經逶銅山退入台灣，kā 東都改名叫做東寧，前後二擺，招募大陸兵民 kah 眷屬來充實戰力。

一六六五年，鄭經委任陳永華做諮議參軍，掌理國政，即帶軍進入漳州 kah 泉州。一六六六年戰事失利，才佫退返來廈門，命令劉國軒攻陷海澄縣後無若久，又佫 hō 清軍奪倒返去，鄭軍十分損失八、九成，才命令劉國軒調集殘兵退守澎湖。

了後，鄭氏政權為着 beh 加強戰力，開始強徵糧草佮民兵，致使民心離散，士氣低落。

辛酉年，鄭經先立尹大子鄭欽做監國，家己不理政務，閒居蹛dīh洲仔尾，企豪華別墅，彫樑畫棟，觀樹賞花，規日干吶嬉遊作樂，極盡島中奢華 ê 生活。

無若久，鄭經死亡，眾人怕鄭欽嚴令，起反，迫鄭欽，kā 鄭欽吊死，鄭欽尹嫫陳氏是陳永華 ê 查某子，嘛吊脰自盡，即立鄭克塽做主。

鄭克塽少年頇顢，福建總督姚啟聖探查知影情形，即一方面秘密奏報清廷，請求出兵攻打台灣；一方面，叫人先 kah 台灣 ê 劉興佮傅為霖秘密約定做內應，想佅到，代志漏洩，傅為霖 hông 殺死，鄭王朝 ê 順公沈瑞也受連累 hông 處死。沈瑞尹嫫鄭氏是鄭王朝 ê 禮官鄭斌 ê 查某子，嘛自盡而死。

清朝准姚總督所奏，派靖海將軍侯施琅做提督，參總督姚啟聖佮巡撫吳興祚 beh 征討台灣。

一六八三年 (康熙二十二年癸亥) 六月十四，清軍對銅山出發，十五日進入八罩灣，十六日開始進攻澎湖，激戰規日，佅分輸贏。

十七日，清軍船隊停蹛八罩灣，十八日攻陷虎井佮桶盤嶼。十九日，施琅親親坐小船到海上觀察軍情，遠遠看見澎湖媽祖台嶼頂下有二座砲台，風櫃尾一座，四角山砲台一座，雞籠山砲台一座，東西巔砲台一列四座，西南內外塹西嶼頭一列砲台四座，牛心灣砲台一座，沿海若會倲登陸 ê 所在攏設墻堡，準備跑彈圍繞三十外里，四過攏有布置水兵。施琅下定決策，於廿一日誓師，廿二日出兵進勦，左師直入雞籠山，右軍功牛心灣，中軍分做八陣，每陣再分前、後二重疊。

施琅將軍坐鎮中樞，調兵遣將，攏總有：

領左師者𣘀興化鎮𣘀吳英

金安鎮𣘀陳龍

銅山鎮𣘀陳昌

領右師者𣘀平陽鎮𣘀朱天貴

海壇鎮𣘀林賢

廈門鎮𣘀楊嘉瑞

提標中營𣘀𣘀𣘀𣘀𣘀羅士珍

彼日，軍旗掩天，船連千里，自早起時仔開始，戰到日落，擊沉鄭軍砲船八隻，燒鳥船二十六隻，偆下走 kah 不知對佗去。右師領將平陽鎮朱天貴戰死，水兵死傷無地挏算，即攻陷澎湖。

劉國軒知影無法度抵擋，勸鄭克塽投降，克塽 ziah 獻軍印八粒，延平郡王金印一粒，輔政公、武平侯、忠誠伯、武衛將軍等銀印四粒，歸降清朝。𣳈

彼噂，明朝 ê 宗室寧靖王朱述桂素來攏 le 依偎鄭氏，台灣既然破啦，全家妻妾吊脰而死。

話佫從頭講起，澎湖形勢上險，船隻佅倲停靠，是水神靈聖，六月初九彼日，海平浪靜，山腳涌出甘泉，大軍才會倲直入台灣。七月初三，施琅報告清廷講戰事已經勝利。八月初二，施琅進駐台灣，鄭氏佮文武百官攏雉髮迎接，免用一兵半卒，也免用一支鎗ia 一支刀，台灣着歸入清國 ê 版圖啦。

【注二】：

日治時代研究台灣歷史 ê 人kā荷蘭時代以前，大約到十三世紀以後此段期間叫做甲螺時代，拄dīh日本 ê 戰國時代中期至德川幕府時代，一刈仔失去幡屬 ê 浪人武士逃亡到海外，例如「關ケ原」之戰戰敗 ê 武士四過流浪，有 ê 來到台灣，交結一刈仔中國海盜le 損澢中國沿海。在中國 ê 歷史上叫做「倭寇」。諸 ê 海賊，親像顏思齊和林七官者自稱是「日本甲螺」，講是日本手下 ê 頭人，所以，清朝起初講台灣屬於日本，無屬於中國，本紀略作者林謙光也講「台灣本屬日本」。

夾板船着是卡拉卜拉(caravela)船，大航海時代(十四--十七世紀)所用 ê 主要船隻，船大二十五到六十噸，有二或三支桅，大船甚至有四支桅，大桅在船 ê 正中央，掛三角帆，四支桅ê大船嘛有掛四角帆ê。此種船起初是葡萄牙人所造ê，航行dīh地中海到太西洋岸之間，後來進出到印度洋、馬六甲到台灣海峽。發現新大陸 ê 哥倫布船隊所駛 ê 着是此款夾板船，當年癸一率領 ê 巴達維亞(Batavia) 艦隊 ê 船隻是Caravela船或是加禮(Galea)船，無資料挏查，但是對林謙光來講，大概攏是夾板船。

安平和赤嵌此二個城是荷蘭東印度公司在季節風航線 ê 主要中途站，dīh十五、六世紀真多歐洲 ê 船隻經由愛琴海到印度洋，駛過馬六甲海峽，到日本長崎，沿路做貿易。

台灣(台南)和泉州是海峽兩岸重要 ê 中途站 (海上絲路三杉隆敏，海 ê 絲路藤本勝次等 )，因為中國沙門 ê 觀念，國內對此方面 ê 資料真少。宋人趙爾适所寫 ê 《諸蕃誌》講：有相當數量 ê 陶瓷出口到台灣(夷洲) 來，現時dīh台南縣布袋彼搭仔 ê 淺海役不時有人撈着宋元時代ê古陶瓷，是一個証據。

後來，日本和歐洲 ê 商人也來台灣，大量收買鹿皮、琉黃和蔗糖。日治時代dīh今仔ê枋寮附近海邊有出土一隻腓尼基 ê 加禮船 (商戰兩用船，掛三角帆，有一至三太桅，五十至二百 ê 櫓銨，二十銎大砲，載重五十至二百噸，加禮船加大改良 ê 叫做加禮翁船)。彼隻船 ê 柴彫 ê 船頭女像，早前蒐存dīh台灣省立博物館，不知今仔役有dīh le 否﹖

東西方 ê 商人來台灣提去一刈仔物件，嘛帶來一刈仔季節風文化，對台灣產生足大 ê 啟蒙作用。林謙光 ê 三言兩語後面會倲看着dīh大航海時代，平埔族已經 le 經營工商活動，有能力消費卡高級 ê 泊來貨(陶瓷)，是相當富足 ê 社會。

和蘭人統治台灣，干吶為着商業 ê 利益，對平埔族來講，既然家己無立國家，着無所謂夆殖民 ê 意識，顛倒認為荷蘭人會倲促進尹 ê 利益。彼時、台灣大概有二萬五千 ê 漢人，其中一半是紅毛人對唐山倩來 ê 「農奴」，尹佇反對荷蘭人，是雇主佮勞工 ê 利益矛盾niahnyā，參本土感情無關。郭懷一是日本甲螺 (高拱乾台灣府誌)，伊 ê 謀反對平埔族來講，有可能影響尹 ê 安定和利益，無關係平埔族kah 漢人 ê 問題。

十六世紀尾，季節風貿易接近尾聲，一方面和蘭國力衰退，安平佮赤嵌二城 ê 地位無以前遐尔仔重要，紅毛人早着想beh 抽返去耶加達。荷蘭人起初提議每年收一萬兩銀佮若干實物，beh 將台灣租讓hō鄭成功，最後協議荷蘭人實收一萬兩，永久撤出台灣。

1661年四月鄭成功登鹿耳門，1662年2月荷蘭人投降，五月鄭成功死亡，楊英ê《從征實錄》講「初至(台灣) 水土不服，疫癘大作，病者十之八九，死者甚多…於是人心惶惶…將士多不愿行，成功之發憤戉卒，其最大原因也」講：鄭成功發狂死亡，可能是着麻拉利亞熱狂而死 ê。

起先，鄭經亂倫私通尹小弟 ê 奶母陳氏(一說尹父 ê 小妾)，生一個子，鄭成功大受氣，殺陳氏母子，佳哉鄭成功早死，才留鄭經一條狗命，續落去、殺叔奪權，《從征實錄》講「殺經之事是鄭成功憤死 ê 直接導火線」。

清皇帝曾經致書互鄭經講：「以汝父子為朝鮮之箕子，在台立國，互息干戙，不相侵犯，免得兩地生靈塗炭，宜汝審思」(咏擺存dīh台灣省立博物館)，因為鄭經要求割讓浙江kah福建、廣東三省，和議自安呢破裂。

鄭經和蔣介石相像，實施黷武 ê 軍事政策，hō民不聊生，自己卻生活奢侈，三妻四妾之外，佫私通陳氏，續落去、隱居dīh洲仔尾做阿舍。

鄭經 ê 長子鄭欽是妾所生，弟鄭克塽即是元配陳氏所生，鄭欽掌權後，清國佫和鄭氏講和，陳氏不願政權hō偏室繼承去，聽說鄭欽beh hām清朝和解，有意在台立國，即召集黨羽加鄭欽掠起來，講：「當年先王來台，是beh反清復明，不是beh在台立國」，講：「鄭欽不是正統 ê 人篡鄭氏王業，也敢違背先王旨意，是為叛國(明)賊」，加鄭欽絞死，扶立克塽繼位。

鄭氏政權dīh短短三代人，發生二擺流血 ê 奪權鬥爭，克塽尹母陳氏利用統獨佮正統情結 ê 鬫爭手法，今仔日宛然佫le 重演。鄭氏政權錯失立國機會，致使終久滅亡，咱着愛會記得此段歷史 ê 教示。

傅為霖和沈瑞hiai 台奸 ê 下場悽慘。

澎湖灣dīh今仔 ê 馬公港一彼搭仔。虎井、桶盤嶼是澎湖群島中 ê 小島，dīh風櫃尾附近。雞籠山、指澎湖 ê 雞籠嶼，dīh八罩彎外，不是現在 ê 基隆市和平島。

「反清復明」kānnā 用嘴講 ê niahnyā，佅幹當難得！降清後，鄭氏請求清國從優敘卹，施琅加伊拒絕，雉髮後，有人講調入北京任官；有人講被流放南洋到乾隆年間才准尹返去中國，na親像無人知影鄭氏 ê 後代流落dīh啥乜所在？le 做啥乜代志？

寧靖王全家吊脰而死，伊ê 五個妻妾合祀dīh台南市 ê 五妃廟。

此段是林謙光 ê 中國式神話niahnyā，清軍入台了後，起初講蠻夷之地無資格入中國版圖，講心患既除，想beh班師放棄，是施琅極力主張統治台灣，才kā台灣建制，系於福建省。

建置

清軍進駐台灣就緒了後，kāh台灣分做一府三縣，設一個分巡道來管轄，台灣縣dīh中位，管四坊五里九街六鄉。台灣縣 ê 南旁是鳳山縣，逶台灣府起到沙碼碕頭止，總共五百三十里，管六里十四鄰二十餘社，越過沙碼碕頭山屬呂宋 ê 所在，其餘 ê 土番真少入來城市，受土官加佬師 le 管理。台灣縣 ê 北旁是諸羅縣，逶台灣府起到雞籠城為止，總共五千三百三十里，管四里十四鄰四大社，人口多，tāng 勞役 ê 人也多。

其外，亦有二十四社，到雞籠城界盡頭，佫過去無路，也無港灣tāng 歇船，用小艇仔行海面佫十日 ê 路程 ziah 到直腳宣。直腳宣佫過去，猶無人行腳到。

生理人卡有 le 行歇 ê 埠社有大武嚨、倒咯嘓、諸羅山、打猫社、他里務、東螺、南社、麻支干、二林、三林、猫羅社、大武郡、半線、馬芝林、阿束kah 竹塹zia ê 所在。

【註】：

沙碼碕頭是現在 ê 猫鼻頭。

台語有「無話講加佬」、「le 講加佬」，加佬是番頭目。

《台灣紀略》寫於清國佔台後第二年 ê 康熙二十四年(1685)，作者林謙光講：「諸羅縣人口眾多」，稗海記遊寫於十二年後 ê 康熙三十六年(1697)，作者郁永河講：「諸羅以北無一民」，就是講：清國干吶認定漢人或歸化番才是民，其他攏是化外ê人。另外有一本《台海使槎錄》寫dīh二十七年後(1924)，作者黃叔璥講：「大凡台民皆冒籍從姓」，着是講：清國佔台後四十出頭年，台灣 ê 人差不多攏歸化做清國民，冒漢人祖籍、從漢人姓。

直腳宣是dīh花蓮附近 ê 七腳村，就是「蕃屬六考」所講 ê 竹腳宣社，是崇爻八社其中 ê 一社，屬阿美族 ê 居住地，一九○八年尾因抗日受討伐。

大武嚨是現在 ê 新化，在台南縣，是平埔族 ê 居住地。古時在台灣有真多所在 ê 地名叫做Davolang，親象現在嘉義縣 ê 大林鎮，早前漢譯寫做大埔林，有 ê 所在寫做大巴壟。

倒咯嘓是現在 ê 台南縣東山，以前叫做蕃社。

諸羅山是現在 ê 嘉義。

打猫社是現在 ê 嘉義縣民雄。

他里務是現在 ê 雲林縣斗南

東螺是現在 ê 彰化縣埤頭鄉，dīh濁水溪北岸出口附近，佮西螺相對，平埔族貓霧餗 ê 居住地，一八二一年因溪水氾濫，遷到現在 ê 北斗鎮。

猴悶是現在 ê 雲林縣土庫鎮牛稠仔。

西螺是現在 ê 雲林縣西螺鎮

南社是dīh現在 ê 雲林縣二崙佮崙背附近 ê 荷包嶼，康熙六十年建立布嶼稟堡。

「麻支干」有時寫做「貓兒干」，現在 ê 雲林縣崙背鄉豐榮村。

二林是現在 ê 彰化縣二林鎮。

三林是就是三林港，dīh現在 ê 彰化縣沙山附近，是古早島內貿易出入 ê 港埠，後來因為積沙，移到南旁 ê 王功，嘛因為積沙煞廢港。

貓羅社是現在 ê 苗栗。

半線是現在 ê 彰化市。

馬芝林是舊馬芝遴社，現在 ê 彰化縣鹿港一帶。

阿束是貓霧餗 ê 庄社，原本dīh大肚溪口南岸附近，「蕃屬六考」講：阿束社dīh一七一八年因溪水漲県，遷到內陸台地。

竹塹是現在 ê 新竹市。

山川

南旁有一支大岡山，dīh台灣府 ê 東南方三十里，山形親像船倒仆，陰天時仔，雲影霾霧，看見山頂恰若有神仙，有鐵貓兒椗(船碇)，也有龍耳甕，傳說國家若立 beh 有代志，此支山着先發出哮咻 e 聲。亦有小岡山、觀音山、鳳山、赤山、打狗山、半屏山、龜山、凹底山，攏倁海邊 ê 平地凸起來 ê。

阿猴林大樹掩天，北路 ê 山出木材 ê 有木岡，有里沙、放種、買藸、來種、半線、阿里kah 雞籠。

金山 dīh 雞籠山 ê 溪後，溪中出產精金，番仔抾帶手裡，即時間雷公爍-nà。下游出沙金，水極冷，淘金 ê 人逶岸頂看落去，若有金沙，用篩仔捧起來着緊走，卡慢隨時會 hō 水凍死。

奇冷山着是奇領社 ê 山，県規百丈，台灣是最溫暖 ê 所在，獨獨此岦山有雪，到春尾都佅溶，好花插牛屎，好山生dīh 野番中，月光暝仔仰頭看去，色澤晶瑩，親像玉。

南路北路溪港真多，四通八達，離台灣縣八里路 ê 所在有鯽魚潭，掠ê魚有夠挏供給 hō 軍用。台灣府起到淡水為止，攏總有十八條溪，源頭出倁山內，流入海。

【注三】：

大崗山、小崗山攏dīh高雄縣岡山鎮 ê 東方，打狗山是高雄市 ê 壽山。阿猴林是屏東市 ê 古早名。阿猴(akâu) 有時寫做阿緱，是蔦榕 ê 意思，台語叫做「蔦松」，阿猴林就是蔦松林 ê 意思，現在役有一可仔所在 ê 地名叫做「蔦松」或是「蔦松腳」。

木岡後來叫做大目降，是西拉耶族 ê 居住地，着是現在 ê 台南縣新化。

里沙可能是日月潭 ê 水沙連(不確定)。

放種是Panchia 或是Pantuaha，花蓮港北部，哆囉滿一帶阿美族 ê 居住地，也是美族 ê 別名。𣳈

買藸dīh現在 ê 埔里牛眠山到史港坑一帶。

阿里是阿里山，指現在ê嘉義以東的山地，不是現在ê阿里山。

奇冷山着是玉山，林謙光講：親像玉山即爾媄 ê 山，無應該出dīh台灣；中國人 ê 沙文心態，自古着是安呢。

鯽魚潭dīh現在 ê 台南永康鄉附近，潭以經坌無去，變做大灣、蜈蜞潭參網寮彼幾個仔庄頭。

沙線礁嶼

南港口有長長 ê 沙洲，逶南港口起到淡水海外，不知有幾千里遠，北線尾佮安平鎮城相連，kah赤嵌城相對，佫有大線頭佮海翁窟做台灣 ê 外圍保障。鹿耳門參北線尾相連，船隻對 zia le 出入，是台灣 ê 大門戶。

頂淡水城對面有兩支大石，相對倳 dīh 海中，叫做石門。淡水城海中有二塊石頭突出dīh海面，插入天，叫做旗竿石；佫有圭礁嶼，船若碰着，一定破去。

【注四】：

海翁窟着是俗稱ê大江。

石門dīh台北縣 ê 金山，不是dīh淡水城對面；旗竿石以經不存在。

圭礁嶼是浮礁，可能是現在 ê 雞籠嶼附近。

城郭

安平城dīh一昆身，東到灣街 ê 渡船頭，西旁是沙埔，斜坡入海，南到二昆身，北旁有港門，本臹是紅毛人 ê 夾板船 le 出入 ê 所在。一昆身ê 週圍有四五里，紅毛人築城，用桐油參灰舂地基，巩大甓磚，入地下丈外深，闊一二丈，城墻砲孔攏用鐵釘釘絚咧，方圍一里，鞏固佅壞。東旁邊企厝舍 kah 一個市仔 le hōh 民間做交易。城內彎彎穵穵若樓台，頂県 kah 下腳有二搭水泉，一個是鹹水 ê，另外一個是汫水 ê，又佫有一個井，井孔細細仔孔，水桶搫佅入去，井水逶壁頂流落來。城西彼搭本臹是沙崙，紅毛人載石頭來加以筑鞏起來，水衝 būe 崩去。

赤嵌城也是紅毛人企 ê ，dīh台灣ê海邊，參安平鎮相向，週圍半里 niahnyā。

雞籠 kah 淡水是小城，也是紅毛人企來 beh 防備海賊 ê，形勢 ê 關係，南風有利，北風不利。

【注五】：

安平城ê荷蘭話叫做 Zeelandia城，倁一六二四年開始建築，到一六三二年才完成。

夾板船是荷蘭 ê 戰船。當時，荷蘭人dīh澎湖進駐一支巴達維亞艦隊，大員總督癸一着是艦隊 ê 司令官。一六六一年，鄭成功趁癸一返去荷蘭渡假，偷襲台灣，巴達維亞艦隊因為無人指揮，失去戰鬥力，鄭成功圍安平城七月日，荷蘭軍才投降。

起初荷蘭人kah日本借地企城，煞佔去大部份商業利益，kah日本人發生衝突，倭寇首領濱田彌兵衛咂人佮荷蘭人拼，佔安平城 ê 汫水井，荷蘭人不得已，才hō濱田相當 ê 條件撤出台灣。

赤嵌城荷蘭話叫做 Provintia城，dīh一六五零年企 ê，因為企dīh西拉耶 ê 赤嵌社，所擺才叫做赤嵌城，現在叫做赤嵌樓。不過、現在 ê 赤嵌樓是落尾手才佫重修企 ê ，原來 ê 古城已經無痕無跡啊。

戶役，賦稅

自從鄭成功開基以來二十外年，漳、泉 ê 逃民流入來，台灣可以講是富裕 ê 所在。清軍討伐以後，漢人攏逃走返去大陸，現在，le 做公工 ê 半數以上是轄內三十四社 ê 平埔族。若新歸順 ê，役着佫加尹安搭教化，būe 使得kāh尹派工。

台灣地屬沙質，生產力最低，府額kānnā抾地丁稅 (人頭稅) 攏總銀 14882 兩 8 錢 2 分控；稅餉以外，台灣縣抾糧稅銀 5234 兩 2 錢 7 分控；鳳山縣抾糧稅銀 1259 兩 2 錢 6 分控；諸羅縣抾糧稅銀 8398 兩 2 錢 8 分控。

【注六】：

清治初期 (1683) dīh台灣 ê 漢人總數16820人(楊碧川台灣歷史年表)，有十外萬人逃走返去大陸。

清國佔據台灣定着了後，唸彌着kā台灣人當做牛馬，因為當時大部分漢人攏逃走返去大陸，所擺dīh二年內，三十四社平埔族 ê 一半以上hō清國政府強制去做公工。

當時台灣 ê 人口總數大約有二十萬人，每人每年納稅四點七六錢，番餉一至二十兩，田賦 (上田) 粟八點八石 (楊碧川台灣歷史年表)。

學校，選舉

台灣歸順後，清國政府為着啟發民智，設立歲科二試來鼓勵讀書，每試，府學錄取二十名，補缺五至十名，額滿為止。縣學錄取十二名，補缺三至十名，額滿為止。逶康熙丁卯年起，廩生增加為全額錄取，等日後文風較盛之日才佫比照內地命題補足。

提督軍務侯張雲翼關心台灣文教，為着鼓舞、開闢功名之路，特別頒准逶丁卯年起，dīh福建鄉試 ê 正額外，多錄取一名台灣人，等九年學業完成後才佫參內地棘闈同考。因為安呢，蘇峩中了丁卯榜；邑星燦中了庚午榜，林逢秋中了庚午武榜，攏是台灣文明 ê 先驅。現在道府設立社學 le 教番童，所擺漸漸形成文質彬彬，斯文 ê 風氣。

【注八】：

丁卯年是康熙二十六年，一六八七年，此章所講 ê 攏是清國佔據台灣後第五年以後 ê 代志，應該不是林謙光 ê 原作，大概是以後 ê 人加添補記 ê。一種保障名額，好名講是為着鼓舞文教，其實是清化教育。

兵防

台灣總兵統兵一萬，分做十營，安平鎮三營，澎湖協鎮二營，南北二營，左、右、中三營。

【注九】：

有記述講：鄭氏降清了後，所有鄭軍殘部攏夆收編做清軍，無願意繼續食糧 ê 人攏kāh尹送返去中國。江日昇 ê《台灣外記》講：「偽官兵遵制削髮，移入內地，悉聽朝廷安輯」，清河雅孝教授(日本京都產業大學) 講：清國kā尹流放去屯墾烏魯木齊，講：現在kāh烏魯木齊役有一撮仔講閩南話 ê 人着是尹 ê 後代，所以台語有「烏魯木齊」此句話，可能是安呢來 ê 。表示「不好」ê 意思。

津橋

台灣無石材，所有橋梁攏用磚木巩 ê，溪水湍流，容易沖壞去，親像大橋頭 ê 烏鬼橋、鐵線橋，現在攏壞去啊。kānnā 偆嶺後東門 ê 所在有一個橋niahnyā。

對台灣 (指現在 ê 台南市) 離安平鎮 ziah 五里外路，若順風即時即刻會得到，若 ncyî 風 ê 時着愛dīh 水淺 ê 所在用牛車載人上船，到安平鎮 ê 淺澳才佫換小船上岸，規半日嘛 būe 得到。

其他各港，船隻攏會倲徇溪直直仔入去。

【注11】：

林謙光kāh橋梁 ê 問題講是台灣無石 ê 關係，其實這是原因之一niahnyā，台灣山崎水湍，溪流佫闊，才是真正 ê 原因。當年西班牙人發現台灣 ê 時，逶大安溪看去，叫而台灣是三塊島咧。拍算安呢互溪水隔咧，平埔族才會形成做九個族群。

大橋頭ê 烏鬼橋dīh現在ê台南市三分仔附近，荷蘭時代，烏鬼 (黑奴) 所建築 ê。

鐵線橋是現在 ê 急水溪橋。咏時仔倒風港分做三支，北旁叫做鐵線橋港，《台灣府志》講「鐵線橋港，舊時冬春編竹橋，上覆以土，夏秋水漲，漂蕩無存，設渡濟人。康熙五十五年，諸羅知縣周鍾瑄建木橋，監生陳仕俊捐銀五十兩助之，然水潦衝決，時壞，時修。乾隆二十七年貢生翁雲寬等倡建，廣大堅固」；鐵線橋着是用鐵線建造 ê 吊橋。林謙光 ê 時噂，役無鐵線橋，干吶有「編竹為橋」 ê 橋都已經壞去。

天時：

台灣 ê 天氣參大陸無仝，佅落霜佅落雪，人不免穿裘仔，春夏冬攏晴朗，雨季dīh 秋天，風颱多，有鼠尾風；土人講正、二、三、四月起 ê 叫做鼠尾風，五、六、七、八月起 ê 叫做風颱；風颱卡大鼠尾風，鼠尾風卡狠風颱；鼠尾風 beh 來 ê 時，天紅氣霧，着愛予防；風雨 beh 來進前，海kahna雷 le 哮，暝日無歇，一對時仔 ziah 會恬。

【注12】：

台灣 ê 氣候屬亞熱帶海島性氣候，秋雨叫做踦秋，鼠尾風是「龍卷風」，dīh西南方 ê 地平線頂若發生一條深烏色 ê 靉靆雲，雲頂茫霧，雲下清朗帶紅霞，一目眤仔着對烏雲 ê 中央伸落來一條烏雲恰若鼠尾，岌岌旋，一打久仔等鼠尾若丩無去ê時，霎時間，飛沙走石，狂風大作。近年來氣候變遷，此款鼠尾風卡少出現啊。

地理

南北二路，胡匏草茨滿滿是。溪水湍流，佳哉沙坡平平，牛車會dàngh 輦接輦來行。水浮石冇，土無堅實，所擺所種作ê五穀，雖然參中國仝款，嘛佫干吶有屘冬一季挏收niahnyā，枵餓在所難免，佳哉有旱薯、芋仔tāng 抵喙。

【注14】：

所謂南北二路是講：離台灣府卡邊仔 ê 所在。林謙光dīh前章賦稅 ê 所在講：台灣「稍稱沃野」，dīh此章煞講「水浮石冇…枵餓在所免」，實在矛盾。dīh林謙光寫此本紀略 ê 時噂，台灣已經經過和蘭人佮鄭氏父子 ê 開發經營七十外年啊，dīh中國人 ê 心內，世界上佅使得有比中國卡好 ê 所在。林所講 ê 秋收是講水稻，其實嘛亦有埔稻，嘛有春天收成ê 叫做早冬。芋薯以外，嘉南地區一帶直到日本統治初期水利猶未做好勢以前，嘛 le 種麥仔和蕃黍，米、薯以外嘛 le 食大麥餬或蕃黍粿。

食芋仔或是食蕃薯，kah俄羅 ê 一刈仔所在 le 食馬鈴薯，或是卡早美洲 ê 印地安人佇食豆仔仝款，dīh碾磨工具猶未發達 ê 時代，豆、薯是最方便 ê 糧食，也是隨地方 ê 習慣，未必是枵餓才le食芋薯抵喙。

芋仔是本土作物，佮一刈仔行事禮俗有關係，比喻「完聘」送芋、生子四月日，後頭厝送芋、酬神祭祖拜芋、勁灶送芋佮中元食芋安呢，俗語講「蚵溪對額，芋仔好食」；蚵溪是銀河，中元時節蚵溪dīh頭頂中央，仰頭觀望 ê 時，頭額正對着蚵溪，是芋仔上介好食 ê 時節。

書籍攏講台灣是漢人來開墾 ê，三四百年前，中國人口役無一億，赫尔仔大 ê 國土，若beh開墾，哪惊無田挏作，哪着揹死來這這「枵餓難免」ê 孤島創啥﹖到呾猶有赫尔多 ê 中國偷渡客beh來台灣，可見台灣不是「鳥不語，花不香」 ê 所在，顛倒是富足 ê 樂園。哀哉！中國人 ê 獨尊思想無所不至，歪曲台灣 ê 歷史，也扭曲台灣人 ê 價值觀。

風俗：

小小化外之地，流民藪仔 le 去 ê 所在。漳、泉人以外，攏是刁頑佫惷愩 ê 土番 kah 土人，無姓，也無拜祖先，父母以外，無阿伯阿叔，也無外甥、母舅 ê 稱呼；無月無日，也無庚甲，愛刣人剢人頭去洗滌後，搭銅錫箔仔，供蹛尹兜。男女攏赤腳，無穿褲，頂身穿短衫，下身圍一塊布；查某人用靘布做腳縛，佫繡花草；查甫囝仔若十四、五歲着辮藤束腰，所以射鳥仔、追野獸，緊恰若馬 le 趵咧。

頭鬃若長，一半剪掉，一半用草縛，嘴齒用芻草染烏，攏貫耳，孔大 kah 會使得塞入碁砬，ziah用柴環貫咧。攏刺字，有 ê 規身軀刺滿紅毛字，攏掛手環，有金銀做 ê，也有銅錫做 ê，有人掛數十雙。役有插鳥翅，垂到肩頭，佫掛螺仔殼做 ê 帗鍊，le 展鬥媄。

重女輕男，查甫着愛去 hō 查某贅，查某贅尪來厝迡蹛，結婚 ê 時，查某先入去公廨，若聽着查甫倁外面 le 呠口琴，ziah 出來 kah 伊會合，若有甲意 ziah kah 尹父母講，tāng 備辦酒席請仝社 ê 人，自安呢結做尪嫫。

穡頭攏查某 le 做，查甫顛倒dīh厝裡 le 等食，尪嫫若 būeh 合，無論有生無生，常常 kah 人相交換。𣳈

辣天時，查甫查某攏相對面坐，做愛 ê 代志對幼輩盡量閃僻，若弟妹、子女着無啥禁忌。

婦仁人拄生子着參嬰仔用冷水洗浴，有病不知醫，卻去溪裡浸水，講是觀音dīh水中下藥 le 救助人 ê 病，連 nkwâ 天時仔嘛 le 浸水洗浴，講真爽快。

人死結采蹛門迡，所有碗盤衫仔褲 kah 活人平分，死者彼份參屍體做伙坮蹛床腳，三日後，才會齊仝社 ê 人佫挖出來灌米酒，了後即加以深葬，無用棺柴，若移徙，着杇出來佫重坮。

番仔厝県地面四、五尺，深佫阨，na 船形，前後無隔間，樑柱攏畫五彩，霎霎掃洗，無一點仔沙痕。厝後攏種柳樹佮綠竹，涼氣佅翕辣；無被，用衫掩身軀；無灶孔，用三腳株拄堝仔踮土腳煮，若煮糜着圍蹛堝仔邊用椰子殼仔碗貯糜食，煮飯着用手掟規丸提 le 食。

米 beh 煮才舂，粟仔五穀參衫仔褲攏囥 dīh 葫蘆匏仔內。愛飲酒，米用嘴哺爛囥蹛竹篝內，三幾日仔着變酒，敬人客 ê 時，家己先 zip 一下才請人客飲。

出入攏坐牛車；當着山路崎坎着攀藤過去；當着溪路深闊着跳石過去，傳送文書 ê 人兩手掛玲瓏仔，玲瓏叫，走恰若 le 飛。

尹 le 用 ê 標槍長五尺外，一百步內百發百中，削竹pùe-仔做弓，用麻索做弦，箭長佫銳，無令仔翅；耕田看草生為準，用秋收彼日做一年 ê 開始。

佫卡深入山內，有一款人親像猴，身高無三尺県，見着人着緊扒 qidlii 樹尾頂，若 beh kā 掠，着張箭 kâng 射。亦有一種親像太古人踮dīh土迒內底。

土官有正 ê、有副 ê，大社六、七個，小社三、四個，分派dīh所屬 ê 公廨，有代志着來公廨參詳，小番dīh 外口聽人差 kah，有會曉寫紅毛字 ê 叫做「教冊」，le 掌管記錄參收支數字，削鵝毛管搵墨汁，不是坦直寫，是逶倒旁向正旁坦橫寫。

【注15】：

包括平埔族佮高山族，漢人看漢人以外 ê 人攏是番。

中國以外大概都攏安呢，兄弟姊妹、伯叔、外甥、母舅是敘述詞niahnyā，無一定是稱呼 ê 代名詞，台灣人對平輩以下，親像兄弟姊妹攏是吊名吊姓，愈中國化了後，連小弟、小妹也叫「弟弟」、「妹妹」，其實、中國以外，對平輩以下ê人攏嘛是直叫名字niahnyā。

平埔族無馘首 ê 風俗，林謙光kā平埔族參高山族濫做伙講。

戰前，台灣農家婦女攏縛腳縛仔、掛手囊、吊笠仔巾，現在腳縛仔已經罕呢看見啊。

郁永河 ê《稗海紀遊》講：平埔族ê查甫人攏「盤髮、包頭」，用苧仔索縛頭鬃。戰前ê農村青年dīh廟祭 ê 時，猶有人縛「目工仔頭」，佮琉球 ê 風俗beh仝款，包頭是親像阿拉伯人用烏布巾纏頭。包頭直到近年，因老人代謝才踔踔仔消失去。

結婚過 ê 婦女才有染齒 ê 風俗，日本早前嘛有此款風俗。已經過身去ê民俗研究者張永欣先生講：是用檳榔子染 ê。咏擺有一刈仔阿婆，食檳榔食kah嘴齒烏烏烏，講真安呢真媄，vurhdyāh 着是染齒 ê 風俗留落來 ê 。

關於刺字此段，可能受着山海經 ê 影響，刺字vurhdyāh有，嘛佫無啥乜實例挏好証明平埔族有彼款風俗。

關於「牽手」，既然原住民是母係社會，入贅 ê 男人哪會倲kā嫫參別人交換？顛倒漢人有賣嫫 ê 情形；台語有「賣嫫做大舅」此句話是安呢來 ê。

漢人家己 ê 想法是「男女受授不親」，才是文明禮教，熱帶風俗加海島 ê 生活方式，無啥乜好奇怪ê。

看着平埔族已經 le 信奉觀音，至今台灣人役普遍dīh廳頭懸掛觀音媽嚓仔le伏祀，這中間拍算有某種因緣關係；台灣人所伏祀 ê 觀音佮佛教 ê 觀音無啥相仝，有人講是阿立祖 ê 有像化。立祖 ê 男性化叫做「老君」，親像台南縣大社 le 祭拜 ê 着是。

「觀音」此句話參現在 ê 台語發音相仝，可見當時平埔族 le 使用 ê 語言大概kah現在 ê 台語差不多啦。

所有發掘過 ê 古跡，早 ê 親像埤南遺跡攏有棺郭，晚近 ê 親像十三行文化ê顛倒無棺郭，墓葬此段所講 ê 葬禮不知是佗一族 ê 代志，講「移居乃取出再埋」，大概是le 講環太平洋 ê「洗骨葬」文化，也着是「抾骨」ê 風俗。

厝 ê 描寫有疑問；郁永河 ê 《稗海紀遊》講：赤嵌是因為規遍 ê 紅磚紅瓦才叫做赤嵌，雖然牽強附會，嘛佫會倲看着赤嵌社 ê 平埔族 ê 厝是紅磚仔厝，當然役有一款草厝，是竹棟仔坎草，格局參磚仔厝差無若多，佫有一款有腳 ê 竹仔厝，俗稱更寮仔，是正南島形 ê 杆欄建築，直到戰後初期，dīh嘉南一帶 ê 農村役佫會倲看着此款更寮仔，但是已經無le居住，kānnā用做笨仔niahnyā。此段所講「番仔厝県四五尺」，不知是講「厝腳県四五尺」或是講「厝 ê 県度對地面算起県四五尺」﹖若是後者，林謙光所指 ê 是高山族 ê 房舍，林謙光常常kā平埔kah高山族濫摻 le 講。

後段、食飯 ê 情形，這kah古早日本人 ê 情形相仝，後來日本人發展出飯圚這種飲食文化。

哪有赫尔爾大粒 ê 匏仔萼，會容得貯粟仔五穀參衫仔褲﹖

台南縣歸仁鄉 ê 紅瓦厝古窯群遺址有出土一種紅陶燒造 ê 焗酒器，此段所講 ê 造酒 ê 方法，是另外一種造酒 ê 方法；黃叔璥《番俗六考》講：「番婦口嚼(米)成粉，置甕中，或入竹筒；亦用黍桿燒灰，攪成米趜，發時，飯或黍秫和入，旬日便成新酒」。

「…坐黃犢」，台中市圖書館有一張岸裡社頭目潘敦仔騎黃牛遊街圖；牛車、黃牛是彼當時主要 ê 交通工具。

此段宛然是山海經，講無厘 ê 。

土官叫做「加佬」，頭目或是副頭目ê稱呼；台語有「講加佬」、「無話講加佬」等俚語；埔里烏牛欄附近有地名叫做加佬ê 地方，着是平埔族 ê 頭人 ê 意思。

紅毛字着是羅馬字母，平埔族人用羅馬字來寫所謂 ê 新港文。新港文是一種南島語濫雜閩南語 ê 文體。荷蘭人透過傳教師來教化平埔族人，一六四三年，dīh傳教師游紐斯 ê 教導下，kānnā 新港社、目加溜灣社佮蕭壟社着有六百個會曉用羅馬字來寫新港文ê 學生，其中五十個人 hông 選做「教冊」。

「教冊」ê「冊(ceh)」是南島語「智識」ê 意思，連生為福建長樂人 ê 林謙光叨聽不bad 此句話，用漢字寫做「冊」感覺是「書本」ê 意思；「教冊」本來是「傳授智識」ê 意思，和漢語「教師」ê 意思相通。彭孫貽 ê 《靖海志》( 附錄二) 講：「台灣人猶有習其教者，曰教冊，成功則盡除之」，意思是講：荷蘭人走了後，會曉寫新港文 ê 平埔族知識份子攏互鄭成功殺死。

物產：

鳥類有鴉、鷺、鸂、鶒、鴛鴦、杜鵑、班鳩、雀鳥、鶺鴒等類，鴻雁、燕、鶯侫有是有罕哩看見；鵲鳥 kah 鷓鴣絕對無。

山內無虎，有豹，豹佅咬人，所以鹿仔獐仔規群，滿山滿是巳，四過損澢。野牛上爻湠，設稠加以圍來飼，有典牧官 le 掌管，農夫若欠牛隻，着稟報，即牽返去使，到老無力，才佫加伊放生。

水堀內有大龜，若泅來水邊，着夆掠去刣食。

果子有檨仔上好食，形親像豬ê腰子，味真甘甜，會挏和荔芝相比並，嘛佫隔暝着爛去，所以佅倲帶到遠路去。佫來是波羅蜜、梨仔、柭仔、王萊、芎蕉、柘榴、柑仔、柚仔、椰子，檳榔、甘瑪蜜，各地攏有出產；有時也有荔芝 kah 龍眼。

花有四季錦邊蓮上好，佫來是蘭花、桂花、梅花、桃花、芙蓉 kah 刺桐，kānnā 無牡丹花niahnyā。

內山有大叢樹，是自古以來 ê 物件，不知叫做啥乜樹名。竹仔有親像斗赫尔大，県數十尋 ê；藤真多，有旋里外路遠 ê，會使做碇索，也會用得縛茅仔厝。

頂淡水出琉磺，番仔採 le 換鹽、米、菸 kah 布。

鹽出倁洲仔尾佮淡水二搭，胡鰡、烏魚出倁坑仔口 kah 打狗港；紅蟳 kah 蝦仔出倁蚊港；蚶仔、毛蟹，蚵仔、螺仔，各地海邊攏有出產。

【注】：

鵲鳥、台語叫做「客鳥」，鷓鴣、台語叫做「鵪鶉」，不是無，是林謙光無看着。

中國人愛鵲鳥，叫做喜鵲，台灣人忌鵲鳥，講是破格鳥；中國人愛鷓鴣，台灣人講「鵪鶉仔無尾溜」。

這是延續荷蘭人 ê 政策，荷蘭時代有引進一刈仔優良 ê 印度黃牛，本地人叫做赤牛，着是黃叔璥所講 ê 「小犢」，岸裡社頭目潘敦仔所騎 ê 彼款牛。

台灣人無食龜。檨仔參荔芝 ê 氣味相尷尬(kèhnkwi)，若bad食過檨仔 ê 人，絕對佅kā檨仔提來kah荔芝比。

甘馬弼、「蕃茄」？

大概是指松羅仔樹(檜木)，親像阿里山神木赫尔大 ê 松羅仔樹。《稗海紀遊》ê 作者郁永河倁一六九七年(康熙三十六年) 來淡水買琉黃。

台南 ê 鹽埕以北到北門、南鯤鯓一帶是台灣產鹽最多 ê 所在。

坑仔口可能是現在 ê 旗後一帶，既然是出產烏魚 ê 所在，一定是倁海邊。打狗港是現在 ê 高雄港。

古早 ê 蚊港是現在 ê 嘉義縣東石鄉塭港，現在 ê 蚊港倁雲林縣台西鄉，舊虎尾溪出海處。

附澎湖：

澎湖本來屬 dīh 福建省 ê 同安縣，明朝時代，因為所在 dīh 海中，住民四散，稅 qirh būeh 着，煞kāh 伊放拺。後來有大陸 ê 人佅堪得官府 ê 苦役，逃走去遐，同安佮漳州 ê 人上多。到紅毛人佔領台灣ê時，kāh 澎湖合併去，鄭成功父子繼續佔領做台灣 ê 門戶。

攏總有三十六 ê 島嶼，媽祖嶼上大， dīh 港仔口有二個砲台；佫來是西嶼頭，所有島嶼 kānnā 西嶼地勢卡県，其他攏平坦坦。

逶廈門到澎湖，拄 dīh 船路 ê 半中央有一條黑水溝，海水黑黛色，不知有若深？若順風 ê 時七更半水路着會到，若當着風颱，卡小 ê hō 流去別 ê 港，遲宕規個月yaa būe 得到；當着卡大 ê 風颱 ê 時，犯礁 víing 船，所以船夫攏會曉聽風勢看天氣，起帆着先用指南針定好方向，春夏逶鎮海出航，正南風，坐三百三十度向東南南方位一百五十度；西南風，坐三百十度向正東南方位一百三十五度；冬天時逶寮經出航，正北風，坐二百九十五度向東東南方位一百二十度，到半暝轉坐三百度向東南方位一百三十度；東北風，坐二百十度向東東南方位一百十度；役是逶圍頭出航，正北風，坐三百十度向正東南方位一百三十五度，到半暝轉坐三百三十度向東南南方位一百五十度；東北風，坐三百度向東南方位一百三十度，船行到天光着會倲看着澎湖 ê 西嶼頭。

逶澎湖到台灣攏向東航行，早起起碇，到黃昏時仔着會倲看着台灣山。

澎湖無水田挏種，人攏le討掠役是le耕園仔為生。今仔 hō 清軍定着以來，生理 dauh-dauh-仔鬧熱起來，漸漸成做好所在。今仔軍部以外佫有設一個巡檢 le 治理。

【注】：

一三八七年 (明洪武二○年) 廢澎湖巡檢司，加居民攏徙入去漳泉。媽祖嶼是澎湖本島，着是馬公 ê 所在，和蘭時代叫做Pascatol（漁翁島）。

a原文對照