第 2 頁

 　
　

 

〈三〉

　
　

福志路 dīh 雙溪 ê 南旁邊，是一條真奇怪 ê 路，逶福林橋 ê 南旁橋腳起頭，到福林國校 ê牆仔角穵一個穵，佫去一短仔着盡碰，kah 雨農路相拄， 40 米 闊 ê 大路，嘛佫全長 ziah三、 四百米 ，路邊兩旁攏是會用得橫向停車 ê 停車位，講是街路，kahna 親像是一個長長 ê 停車場，連計程車司機都無幾個人知影有 zid 條路。

雙溪 zid 條溪仔 ia 佫卡古怪，規台北 ê 人無幾個知影 zid 條溪仔叫做雙溪，連蹛 dīh 附近ê 人都無幾個人知影。佫卡離譜 ê 是，明明 dīh 溪埔 ni 叨有 qīah 一塊大大塊牌仔，寫着「雙溪」二字大啊大字黑字，問蹛 dīh 堤岸腳 ê 人，ia 是早晚 dīh 溪埔底 le 散步 ê 人，嘛攏講不知影 dīh 尹目睭前 zid 條溪仔叫做啥乜溪？

我是看着溪名牌仔 ziah 知影 zid 條溪仔叫做雙溪。安怎若會叫做「雙溪」？這可能着去請教台北第一博 ê 莊永明 先生 ziah 看會知影 būe？不過，可能因為溪水 ê 源頭對外雙溪山頂流落來 ê，原本叫做「外雙溪溪」、ia-是「雙溪溪」，kāh 重複 ê「溪溪」簡省起來，所以叫做「雙溪」，不知是安呢 ia 不是？。

蹛 dīh 附近 ê 人對「雙溪」zid 個溪名 kahna 無啥認同，無 le 關心，煞放hō būeh 記得去。既然溪水叨對外雙溪流落來，經過芝山岩腳，向西流入雞籠河，自水頭到水尾攏 dīh士林區內，若 kā-i 叫做「士林溪」、ia 是「芝山岩溪」，嘛卡有一個地緣，免看溪名牌仔，用直覺想着想會出來。  

講叨安呢 le 講，其實無啥乜要緊，呼做「雙溪」、呼做「士林溪」、ia 是「芝山岩溪」， 攏嘛是 zid 條溪。

文史學家講：古早士林高地 hōh 一遍 om-omh-ōm ê 樹林 dà 咧，雙溪 dīh 草山腳分叉做二條，一條通過芝山岩前，貫穿士林高地；另外一條跇對芝山岩後，造成一遍湳仔地，大概 dīh zim’ma ê 福林橋 kah 文林橋中間 hid-dah-a，ziah 佫 kah 芝山岩前 zid 條，二條佮做一條，向西流入去雞籠河。逶雞籠河起到北方 ê 西帽山腳屬於「毛小翁」ê 地頭。 Cibokan 溪着是 zim’ma ê 雙溪附近有「芝武干社」kah「內雙溪社」kah 北方 ê「北投社」幾若個庄社。講：Cibokan 溪 ê 兩旁溪岸攏是大榕、阿緱、加苳、樟仔 kah 魚樹，是毛小翁 ê 查甫人 le 追水鹿仔 ê 所在。溪仔底有鮐仔魚、溪魺仔、桀魚、加蚌 kah 仔，  是毛小翁 ê 查某人 le 掠魚，姑娘仔 le 摸蚋仔 ê 所在。

講：Cibokan 溪不是 kānnā 有美麗 ê 記憶 niahnyā，佫有哀怨 ê 悲情故事：kong 有一個蹛dīh 雞籠社 ê 日本人九左衛門尹 bó Ōhamma 愛着仝社 ê 少年家 Adong，二個人相 cūa 私奔走來 bih 蹛里族社 ê 搭搭攸。kong 九左衛門蹛 dīh 雞籠社已經三十年，專門替荷蘭人 le 搜集雞籠人ê 動靜。靠 zid 個關係，擺步荷蘭長官用一疋印花布 kah 一束薰葉仔，買收里族社 ê 頭目交出 Ōhamma kah Adong。Adong hông 活活 pah 死；Ohamma 趁無人注意 ê 時，逃走來到 Cibokan 溪，跳落 Cibokan 溪追隨 Adong 死去。

滄海桑田啦！Zim’ma 連一個痕跡都攏無去啦！無人 ia 佫會記得 Ōhama kah Adong ê 代志，kānnā 偆一個芝山岩孤單單猶原痤[11] le hia；雙溪 ê 水流為着承受住民製造出來 ê 骯髒，zim’ma 污濁那賈。

流過台北市 ê 溪、河、溝仔已經無 kah 一條水是清 ê，kānnā 偆士林 zid 條雙溪 ia 清 kah見底，看會着溪仔底 le 泅 ê 魚蝦，sîagh 來一群白鴒鷥 kah 暗公鳥，有 ê zíu dīh 水岸邊，有 ê 靜靜踦 dīh 水內底，le 等魚仔泅來 hōh 尹 tad 嘴孔。

嘛佫真可惜，zit 款情景 kānnā 對上游到福林橋 zid 段 niahnyā，過芝山岩腳了後，一洚[12]佫一洚污濁 ê 排水排入雙溪內，溪水 dauh-daúh hōh-i 污染去，到 kah 文林橋以後，着 kah 雞籠河差不多啦！仝款是台北 ê 溪河溝仔嗎，哪有 tāng-á「出污泥而不染」？  

Cibokan 溪 ê 鮐仔魚、溪魺仔、桀魚、加蚌 kah 蚋仔已經攏變成化石，zim’ma dīh 雙溪底 le 泅 ê 魚仔清一色攏是吳郭魚。這種對南洋歸化來 ê 魚種，南部人 kāh-i 叫做「南洋鯽仔」，有時講走音去講做「gām-面鯽仔」，生存力特別強，gâu-大佫 gâu-生湠。雙溪底不是 kānnā 有白鴒鷥 kah 暗公鳥 niahnyā，常常看見 ia 有一款佫卡大隻 ê 釣魚公，用手網仔 kā 吳郭魚一網打盡。總是三、五個月後，漏網無 hông 掠去呺酤 ê 又佫生湠 kah 規溪仔 nì，ziah 又佫 hông 網去，又佫生湠，kahna 吳郭魚 kah 手網仔 ê 戰爭。  

Gún 隔壁對面樓頂 hid 個邱太太講：Zit lūr 吳郭魚是上粗俗 ê 魚。不知伊是感覺吳郭魚太多、太臭蔟啦，或是吳郭魚食 nsyū 多，食了勯[13]啊，ziah 會安呢講？Ah-nā 無，伊哪會知 zid 款魚仔是上粗俗 ê 魚？我對 zit 款 hōh 白鴒鷥 tóong-食落腹，hōh 暗公鳥 tóong-食落腹，hōh 人用手網仔網去呺酤，叨 beh 生湠活落去 ê 生命感覺十二萬分 ê 佩服 kah 尊敬。

Na 看溪仔底ê白鴒鷥 kah 暗公鳥，不知尹對 hōh 尹 tóong-食落腹 ê 吳郭魚感覺安怎樣？不知 hông tóong-食落腹 ê 吳郭魚尹 kahkī 又佫是啥乜款樣 ê 感覺？你看，白鴒鷥頭歧歧，目睭 nīah 溪仔底 kim-kim siòng，kahna 雙溪是尹兜 ê 溪；暗公鳥恬恬 kiu tīh 水邊，若親像講尹啥乜都攏無做 hid 款，吳郭魚猶原 dīh hia le 戇戇泅；水岸邊 ê 竹仔草 dām tīh 水面，hōh 水割 le 趛趛搖。

　

〈四〉

初搬來福志路 ê 時，水岸邊 ia 有一寡仔菅芒 kah 蘆荻仔、kah 一撮仔罕呢看着 ê 燭仔草，講是為着美化環境，zim’ma 攏 hông 斮了了去啊！堤岸頂嘛是仝款，本來雙溪 ê 南岸是一寡自然發出來 ê 雜木仔林，有想思仔樹，有苦柃、樟仔、鹿仔樹、桑葚 kah 觀音竹仔，kah 一寡仔不知名 ê 樹木；佫有柭仔、棋杷、桃仔、文旦，kah 樹蘭、七里香、巴陀羅花 kah 鷹爪桃，kah 一寡仔四季 ê 草花。

當然，堤岸是人工建築 ê，zia ê 樹木無一定是自然發出來 ê；有 ê 可能是自然發出來 ê，有 ê 大概是附近 ê 人種 ê，對芝山岩前 ê 雨農橋到福林橋，福林橋到文林橋，佫卡過去，形成一條長長 ê 綠色森林，zim’ma 嘛 hōh 人斮 kah 偆一寡仔低低 ê 灌木仔 niahnyā，疏 lang-lang，整理 kah kahna 公園內 ê 花壇。整齊叨有卡整齊，嘛佫卡單調，佫無趣味。

Zia-ê 人 kahna 卡愛 kā 樹木整理 hō 親像尹 kahkī 心內所愛 ê hid 一款，一年二擺，kāh 堤岸頂 ê 樹木 ê 枝仔椏仔剪 kah 圓 qud-qut。春天時仔枝椏仔若發 kah lip-beh 結花芣 ê 時 kāh 尹剪一擺，可憐樹蘭、七里香 kah 大紅花，無枝無椏 tāng 結芣，叫而今年 ê 冬天哪會 ziah 緊來。若到秋天綠葉開始 lip-beh 焦黃 ê 時，又佫 kāh 尹剪一擺，安呢春花 būeh開，秋花嘛 būeh 開，堤岸頂獨獨一欉鷹爪桃，咏年仔開 kah 滿枝頭，今年規年無開 kah 半蕊！

想起陳芳明 dīh 吳濁流 ê『台灣連翹』ê 序文講：「吳濁流踦 le 籬笆仔邊，俹[14]頭看見連翹 ê 根部強壯，想 kong 枝 hōh 人剪去，根若 dī le 着會佫再發大欉起來」。

嘛佫，枝椏仔若一直 hông 剪去，着無枝椏仔 tāng 結芣；無枝椏仔 tāng 結芣着 būeh 開花結籽；būeh 結籽着 būeh 生湠，kānnā 一 qo 老頭孤伶伶，挺強「勇壯」，咁着有啥乜路用！  

懷念咏過仔 hid-款雜木仔林，雖然是一條小小長長 ê niahnyā，嘛卡贏 zim’ma zid-lūr kahna花壇 ê，dîh 都市 ê 公園內一五路都有，ke 一個 a 二個，咁着有啥乜仔 tāng 可揭[15]！咏過 hid 款雜木仔林，有花有草 ê，嘛卡有親像是芝山岩 ê 一部分。

Zid 個叫做台北 ê 大都市，無論對佗一個角度來看，攏是一個好踦起 ê 城市；嘛佫嘛是一個無好踦起ê所在，至少對我來講的確是安呢 ê。古早人講台灣錢淹腳目，有人講台北 ê 錢淹到肚臍，超級市場 ê 架仔頂 nì，農民 ê 血汗 kah 目屎排 kah 滿滿是，le 等台北人親像垢蟻去搬返去囥於冰箱，nîa，ziah 透過消化系統，經由下水道輸送去八里坌仔 ê 處理場，ia 是輸送去淡水河去製造死亡。百貨公司 ê 櫃台頂 nì，嘛有一款佫一款務裕照仔 (bourgeois) ê 空頭，le 等你提 qo-qo-仔去交換一塊仔名牌，tāng kāh 你裝 hō 佫卡務裕照仔咧！Hau-zâi (豪宅) súi-噹噹，Bentsuh 昑 siak-siak，tāng lai-去 101 食燕窩、鮑魚刺參，親像雙溪底 ê 白鴒鷥 ia 暗公鳥 le 吞食吳郭魚安呢，大嘴 sóng 落去。

Mh-kurh，嘛着看你有夠火相[16] ia 無？錢有淹着你 ê 肚臍 ia 無？若無淹着肚臍，嘛着淹到腳目，無淹到腳目，上無嘛着淹到腳盤，若攏無，不是火相 ê 哪乎！嘛是食 nái！Mài le mh-qakkin 啦，lai 去食自助餐卡有影，嘛有魚、有肉、有菜、有味素粉 kah 低級油，總比故鄉阿媽 ê 豆豉仔湯卡好，解決人生 ê 根本問題絕對無問題。

Zid 款都市咁 ia 有啥乜 tāng’ga hōh 你患嫌？

講實在 ê，不是台北不好，是一寡仔蹛 tī 台北ê莎比焉士 (sapiens)，kan 是山珍海味食nsyū 多，舌尾肥大佫結繭，講話唅舌 būeh lình-tńg。我 ê 父親講：山若崎，人 ê 性地着愈粗野，台北雖然不是山，是四面 hōh 山包 le ê 盆地，嘛會使算是山，台北 ê 莎比焉士，人叨攏仝款是人，講話聽 tióh 卡 gāihgirf。有一擺 dīh 上海 beh 去杭州 ê 火車內 t g 着一個長沙婦人，講伊有一個阿爸蹛 dīh 台北，講台灣來 ê 人一看着認會出來，攏是一個面仔怲怲，kahna 人攏欠伊 ê 錢！ia 是 le 無歡喜啥乜？我問伊尹台北 ê 阿爸咁 bad 返來？若 bad 返來，咁原仔一個面仔怲怲？Hid 個長沙婦人講：

「是啊，是啊！就是這樣啊！他變了，記得從前他不是這樣的。」

伊佫講：台灣來 ê 人，若是講普通話 ê 大概都攏是安呢。確實有一寡仔台北人規日 kek kah 一個囂詖面，講話牛聲馬叫大細聲。

Hōh 我 ê 痛苦指數 cìngh kûan 到頂點 ê 是，頻若年兜若到，街頭街尾着 le「咚鏘，咚鏘，咚咚鏘」，鏘 būeh 煞。真奇怪，zid 款無人愛、無人有囥 CD ia 是錄音帶 ê「雜音」，年若到着不知對佗位 bùnh 出 現出來 le 吵死人。叨吵幾若十年啦，台北人 ê 耳腔 kahna hōh 破布 tad 咧，也 būeh 想 kong 換一條仔新 ê 來聽看覓咧。台北 ê 音樂家佫卡烏賚，叨也有法度 ndyìh 恬恬。若連一條仔過年歌都做 būeh 出來，無着換一條仔「百家春」嘛卡有合台灣人 ê 新年。  

繼續閱讀»»»»