麒麟貓

別名：kîhlînhbeNiau (麒麟尾貓)

有一種貓仔 êh 尾溜 kah 一般長長直直 êh 無仝，卡短佫有一個 qīau-qiau kahna pahkad êh，英文名叫做： kinky tail，台語翻譯叫做「麒麟尾」；有 zid 款尾溜 êh 貓仔 dirh 叫做「麒麟貓」ia 是「麒麟尾貓」；亞洲 êh 一部分地區 ziah 有 zid 款「麒麟尾貓」。

台灣本土 zid 款體形卡瘦卡長 êh 貓仔可能是「麒麟尾貓」kah「大陸貓」雜交 êh 後代。

根據日本京都大學靈長類研究所教授野澤謙對「麒麟尾貓」所做 êh 研究，發現日本 êh 長崎、鹿兒島、宮崎、熊本 kah 茨城等地，「麒麟尾貓」比例佔 79.0 % 至 61.4 % 之間，京都、奈良 kah 福井等地降到15.6 % 至 6.5 % 之間，平均佔 41.7 %，認為「麒麟尾貓」可能是由南方 dèh 黑潮 êh 貿易船渡來 êh。貿易船為 dirh 保護船身 kah 船頂 êh 貨物 màih 去 hōh 獠鼠齧歹去，kāh zid 種上 gâuh 咬獠鼠 êh「麒麟尾貓」飼 dùah 船頂，偎港 êh 時，去 hō 逃走出去，或者因為買賣引進入來 êh。

。　

為 dirh 進一步追查「麒麟尾貓」êh 源鄉，野澤去東南亞實地調查，發現 Sumatera 島南端 êh Lampung 省內佔 86.4 %、Sunpawa 島佔 84.5 %、Longbok 島 81.7 %，有名 êh 觀光勝地峇里島 kah 印度尼西亞島降到 47.8 %，一方面中國地區特別華北一帶攏無發現有「麒麟尾貓」，認為馬來半島到印尼 êh Sumatera 島南端一帶 êh 島嶼可能 dirh 是「麒麟尾貓」êh 原鄉。

。

關於飼貓仔 êh 起源，至少 dīh 紀元前 1600 年前埃及 dirh 有飼貓仔 êh 記錄，kāh 貓仔當做是神聖 êh 動物，死後佫 kā-i 製成木乃伊。一般認為是對佫卡早 êh 幾百年前，埃及人養飼利比亞 êh 野生貓仔開始 êh。貓仔 dīh 羅馬帝國 êh 全盛時代傳入歐洲，dāng-時傳來到亞洲無一定 êh 講法，紀元前 1000 年 êh「印度敘事詩」無講 dirh 貓仔，臨終時所有 êh 動物攏圍來 le 哀傷 êh 釋迦涅槃圖內無畫 dirh 貓仔，中國 êh 十二生肖嘛無「猫」zid 個生肖；對 anni 來看，貓仔傳來到中國 êh 時間可能嘛無 hiahnii 早；根據日本 êh 文獻記載，dirh 到 6 世紀佛教傳入日本 êh 時，為 dirh 保護佛典 màih 受鼠害 ziah 引入來到日本 êh。「麒麟尾貓」dāng-時來到日本？根據野澤 êh 研究，大約是 dīh 十四、五世紀以後 êh 代志。

貓仔啥乜時 zūn 來到台灣，無看 dirh 有人做 zid 方面 êh 研究，「麒麟貓」dāng-時來到台灣？仝款無看 dirh 有人做 zid 方面 êh 研究 ia 論述，若比照野澤 êh 講法 kah「麒麟尾」êh 語源 “ kinky tail ” 來看，kah 日本仝款是 dī 十四、五世紀以後 ziah 對南方 dèh 黑潮 êh 貿易船來到台灣 êh 可能性真大。

另外一種可能性是；就台灣 êh 史前「史」來看，「麒麟貓」嘛有可能是台灣 êh「原住民」之一。

台灣有偌多比率 êh「麒麟尾貓」？仝款無看 dirh 有人做 zid 方面 êh 研究 ia 論述，若就「麒麟尾」、「麒麟貓」或者「麒麟尾貓」zid 個名詞 êh 普遍性來看，應該 būeh 比日本卡低 ziah dirf。不過依照目前êh 情形來看，可能已經降低到 2、30 % 以下啦。根據野澤 êh 研究，琉球雖然也 dīh 黑潮航路，琉球 êh「麒麟貓」ziah 有 23.3 % niahnyā，原因是：因為琉球自15 到 17 世紀中間是一個向中國進貢 êh 敕封王國，kah 中國 êh 交流比 kah 南方 êh 交流卡密捷 êh 關係。台灣自鄭成功以後，特別二戰了後 kah 中國 êh 交流比琉球當時佫密捷，ziah 會 hō「麒麟貓」êh 比率一直降低落去。

Ia 佫有一個原因，dirh 是「麒麟貓」上 gâuh 咬獠鼠，都市化了後失去咬獠鼠 êh 功用，可能也誤會「麒麟尾」是一種破-nsyù，其實「麒麟貓」是貓族中極優秀 êh 一種品種。

關連詞：

貓毛

貓神

貓仔食

貓仔目

貓仔門

貓仔空

貓-kēn

貓-kēn 水蛙毛

貓排無生肖

死貓吊樹頭

豬來窮，狗來富，貓來起大厝

對詞：

黑貓

黑貓白肚

虎花

紅貓

紅花貓

白貓