蛇郎君

。

■ 關於神話與傳說

● 華武浪神話

● 達瑪仙與阿好

● 虎姑婆

● 鳳凰與媽達

● 艨艟船

● 地底國

● 蚋仔姑

● 蛇郎君

● 吐血鳥

● 半屏山十八荷萳半

● 虎與貓

● 猴獼仔 e 祖先

● 貍仔與車仔

蛇郎君

(一)

古早古早，有一 ê 所在，有一個 qirh 柴阿伯仔叫做李遠月，做人古意佫老實，無采老嫫仔卡早dirh 死去，放三個 zābokyá hōh 伊 le 拖磨。

遠月仔 kāh 尹疼命命，云云仔 kāh 尹 ncyâ kah 大。大漢 zābokyá 生做一個米篩面，心行無啥好。第二 zābokyá 生做一個匏匜面，規日 le 嫌伊 ê 面仔哪會 hiahni’ya 無好看。第三 zābokyá 生做一個好體態，sui-súi 雞卵面，性情真溫純，佫真有孝。

有一日，遠月仔 beh 佫上山去 qirh 柴，尹三個 zābokyá 和齊 kāh 伊講：

「阿爸，你若 qirh 柴 qirh 好 beh 返來，煞 kāh 我挽一蕊花返來 hō 我。」

遠月仔講：

「Hò！好、好、好！恁若愛花，我 ziah kāh 恁挽返來 hōh 恁。」

遠月仔自安呢渡過一阪橋，行對山 ni 入去。

來到山內，遠月仔 hēh-力 qirh 柴。無若久一堆柴枝仔 cah-cah-cah，用索仔縛做二大綑，用扁擔擔 le，屳過樹林底，行對山尻 beh 返去。

遠月仔行啊行，看 dirh 樹林 hid 旁 kahna 有一間大瓦厝，白色 ê 厝壁 hōh 低牆仔半遮咧。

遠月仔來到牆仔邊，一下看，牆仔內花蕊開 kah 豔麗勢，有紅 ê、有白 êh、嘛有黃 ê cām 紫色 ê花，súui kah būeh 講 zid。有幾枝仔花 suan 對牆仔外出來。

遠月仔想起早起 libbeh 上山 ê 時，尹三個 zābokyá 和齊叫伊 dirh kāh 尹挽花返去 hō 伊：

「哦！Zia 哪有 ziahnii 多花開 kah ziahnii súi！Ah-嘸，來 kāh-i 挽一蕊仔返 làih 去。」

遠月仔腳跜 kûan、cng 手去 kāh-i 挽一蕊花。拄 hid ê 時，無張弛牆仔內 cng 出一肢手，kāh 遠月 ê 手挲 le。

遠月仔惊一抖，仰頭看見一個少年家仔踦 dīh 伊面前；彼個少年家仔生做面路仔清秀佫白肉底，kahna 親像有錢人 ê 子弟。少年家仔大聲講：

「你是啥乜人，哪會來 zia kāh Gun 偷挽花？」

遠月仔着急緊 kāh 伊回失禮：

「啊，真歹勢！我是山尻彼旁庄 ê 人，去山 ni qirh 柴對 zia 過，看 dirh 恁兜園仔內花蕊開 kah ziahnii súi，想 kong kāh 恁挽一蕊仔返去 hōh Gun zābokyá 尹插頭鬃。Nda dūr hōh 你看dirh 啊，請你寬諒一下，後過老歲仔不敢佫安呢。」

「Būeh 用得，花你 dūr kāh 人挽斷去，哪會用得放你煞，ah-嘸你佫 kāh Gun 接接咧。」

Hōh 伊遠月仔頭殼 dìmh kah beh 斷去，身軀拜 kah kah beh 圮土，少年家仔都攏不肯放伊煞。

「我是一個 qirh 柴人，厝 ni 也無錢，也無田坵 ya 寶貝，kānnā 有三個 zābokyá niahnyā。Ah-嘸、用一個 zābokyá 賠你好呣？」

遠月仔 hōh 伊迫 kah 無步驟，一時間煞糊塗，講出 zid lūr 天大地大 ê 代志。

「安呢、好！我 dirh 寬諒你 zid 擺，你不 tāng būeh 記 zid 你 zim’ma 講 ê 代志。」

少年家仔 cām 遠月仔約 kong 十日後 beh 來娶親，ziah 放 hōh 遠月仔返去。

(二)

看見遠月仔行落山尻去，hid-個少年家仔緊變做一隻蜜蜂，飛進前，來到遠月仔尹兜，看見遠月仔尹大漢 zābokyá dīh 灶腳 le 煮飯：

「哼、哼、哼，有一個少年家，beh 娶姑娘仔 tāng 做 bó，鳳冠戴、紅蟒襖，于士裙繡鳳凰，紅頂駟轎八人扛，連炮仔 vinh-víang 叫，古吹 nhyī-nhā 叫，請姑娘仔梳妝 tāng 上轎。」

大漢 zābokyá 聽見蜜蜂 le 嗡嗡叫，真受氣，giafh 煎匙 beh kāh 蜜蜂拍 hōh 死。蜜蜂趕緊飛閃開，飛去歇 dùah 第二 zābokyá ê 頭鬃頂，又佫 dīh hia 嗡嗡叫：

「哼、哼、哼，有一個少年家，beh 娶姑娘仔來做 bó，鳳冠戴、紅蟒襖，于士裙繡鳳凰，紅頂駟轎八人扛，連炮仔 vinh-víang 叫，古吹 nhyī-nhā 叫，請姑娘仔梳妝 tāng 上轎。」

第二 zābokyá 拄 le ntyīh 衫褲，聽 dirh 真 gêh-耳，用針 beh kāh 蜜蜂 caqk hō 死。蜜蜂看 dirh 安呢 nsyi，緊飛走，飛去第三 zābokyá ê 身軀邊，佫 dīh hia le 嗡嗡叫：

第三 zābokyá 拄 dīh 埕 ni le 掃泄，聽見蜜蜂安呢講，無受氣，也無親像大姊尹二個，講 beh kāh蜜蜂拍 hōh 死。伊 kāh 蜜蜂講：

「親情大事 hōh Gun 阿爸 le 主意，此款代志，lângh Gun 細漢 zābokyá 不敢答應你。」

蜜蜂聽見第三 zābokyá 安呢講，佫 kāh 伊看一個卡詳細，知影伊是一個 súi 佫孝順 ê nkyalî，十分kah-意，決定 beh 娶第三 zābokyá 來做妻兒。

隨後，遠月仔返來到厝 nìh。

遠月仔想 dirh 真後悔，哪會 ziahni’ya bûrhsyasì，kāh 人偷挽一蕊花，煞 dirh 賠人一個 zābokyalî，zim’ma 約人十日 beh 來娶，nda 看是 beh 安怎？

遠月仔自安呢煩惱 kah 暝 būeh 睏、三頓嘛攏食 būeh 落去。安呢過了兩、三日，尹大 zābokyá 來叫遠月仔食早頓：

「阿爸、阿爸，來食早起，zid 碗是過暝粥，hid 盤是鹹瓜-kê，阿爸若不惊鹹，制你筴去配，若有啥乜煩惱，食飽 ziah 來講 hōh zābokyá 知。」

聽見大 zābokyá 安呢講，遠月仔想一個定，ziah kāh kāh 人偷挽花ê代志，從頭講 hōh 尹大 zābokyá聽；講伊約人十日 beh 來娶，你是我 ê 大 zābokyá，ah-嘸你來嫁 hōh hid-個少年兄。」

「阿爸你講安呢 beh 哪 dirf？花是你 kâng 挽，kângh 我啥 dīhdāi。Lângh Gun beh 嫁好額人，半路ê 野漢 sen 不-tang。」

伊大漢 zābokyá 搖頭不同意。

Hid ēdàu，換尹第二 zābokyá 來：

「阿爸 lai 去食中晝，麥仔餬 qènh 蔥頭，菜脯米，鹹魚頭。麥仔餬免用哺，魚頭煎 kahl 烙烙烙，若有啥乜煩惱 ê 代志，食飽 ziah 講 hōh 恁第二 zābokyá 知。」

遠月仔目睭 tíi 大蕊，duziah 大 ê 不搭應，佳哉 ya 有第二 ê，nda dirh趕緊 kāh 伊問看覓：

「Ah-dūr，阿爸 kāh 人偷挽一蕤花，ziah dirh 賠人一個 zābokyá，nda 恁阿姊不肯嫁，ah-嘸你來 kāh 伊替。」

第二 zābokyá 聽 dirf 惊一下：

「阿姊 le 講無不 dirf，花是你 kâng 偷挽 ê，kângh 我無代志。Lângh Gun beh 嫁意中人，黑白允人 ê Gun 不知。」

遠月仔聽 dirf 真無望，大漢 ê、第二 ê 攏不肯，後手 ziah 偆四、五日，拍算老 ê dirh lai 死。

彼 ēhng，第三 zābokyá 來叫遠月仔食暗頓：

「燒燒白米飯，鹹鹹是滷卵，nzya-nzyá 菜頭湯，阿爸制你食 hō 飽，有啥乜代志第三 zābokyá ziah 替你擔當。」

遠月仔聽一見，心頭真歡喜，大 ê、二 ê 不乜鬼，偆 zid-個尾 nkyá 卡伶俐，緊 kāh 伊講透機：

「頂日仔阿爸 kāh 人偷挽一蕊花，煞 dirh 賠人一個 zābokyá，約人十日 beh 來娶，恁兩個大姊攏總 te 不知，nda 偆你上乖，ah-嘸你來嫁 hō 伊，若無阿爸穩 dàngh 死。」

「阿爸你 nda 免煩惱，kāh 人挽花為 dirh nkyá，疼 nkyá ziah 來惹禍端，不甘 hōh 阿爸 le 操煩，會好會歹 Gun ê 命，由你阿爸怎安排。」

遠月仔聽一見，baksái 直直流：

「恁母仔 kāh 恁交 hōh 我，zim’ma 你 beh hôngh 娶去，是禍是福 ya 不知，心肝實在足艱難。」

第三 zābokyá 緊 kāh 伊 dàuh 安慰：

「人講第三 zābokyá 食命，niah-準我若出嫁去，ya 有阿姊尹 le 有孝你，制你心肝放 hō 開。」

自安呢，決定第三 zābokyá beh 來嫁 hōh hid-個少年家。

(三)

到約定 hid 一日。

Hid ēhng，鑼鼓叮噹叫，冬瓜二大箱，糖酸三大籠，猪豧雙旁劁，八音行頭前，花轎 dèh 後壁，少年家仔騎白馬，白馬掛金鞍，金鞍雕纓絡，家童仔左右隨，來到遠月仔尹兜，beh 娶第三zābokyá lai 過門。

來講遠月仔本dirh 貧匈人，一間草茅像斗籠，zim’ma 來 kah ziah 多人，土尻拍鋪嘛無夠。遠月仔拄 le 想 kah būe qāiqiau，少年家仔講：

「Nda 你不免 le 煩惱，若有幾支仔竹篙 dirh 有夠。」

遠月仔聽 dirf 心憢疑，想 kong 竹篙是 beh 安怎睏？Ah-無嘛是無伊法，hōh 伊幾支仔竹篙，看伊是 beh nvyìh 啥 báng。

Hid 半暝，大家睏 kah 五甲味，四過恬寂寂。遠月仔翻起身，想 beh 去 kāh 看一個分明。

遠月仔來到廳門口，看dirh 少年家仔變做一尾白蚺蛇，囷 le 匟床頂；跟隨 ê 人嘛攏變成蛇，一尾一尾吊 dīh 竹篙上 le 睏。

到 zia 遠月仔 ziah 知影 zid-個少年家仔原來是蛇郎君，惊一下險險仔昏落去，na 爬 na 碢，緊走去報 hōh 尹第三 zābokyá 知影，叫伊 dirh 緊走，不 tāng 嫁 hōh hid-個少年家，若無穩當死。

第三 zābokyá 講：

「阿爸，人講做人信用踦第一，你叨 kāh人約好勢，zim’ma 我若反悔來走離，你 kah 阿姊三個哪會直。人講第三 zābokyá 食命，是禍是福由在天。」

聽 dirh 第三 zābokyá 安呢講，遠月仔一分歡喜三分憂，歡喜 zid-個 zābokyá ziahnii 有孝心，煩惱伊哪會ziah 薄命。

念彌天 dirh 光，第三 zābokyá 自安呢上轎，hōh 蛇郎君娶去。遠月仔 baksái na 流，送尹過小橋，屳入樹林消失去。

(四)

日子一日過一日，第三 zābokyá 已經嫁去十二日。Hid 早起，有一頂轎停 dīh 遠月仔尹兜門腳口。

「親家公，Gun 兜主人派我來，beh 請你過府 lai 行親。」

遠月仔聽伊安呢講，知影是蛇郎君派來ê轎伕，趕緊草鞋穿咧，瓜笠仔戴咧，veh 上轎，beh 去看尹第三 zābokyá。

二個轎伕扛起行，一目瞬睝來到一間大府宅，有人 cūah 伊入去一間大廳。遠月仔看見大廳內玉階砌紅玉，白壁細雕龍，紫檀窗栱蝙蝠，推朱麒麟桌，瓷瓶插玉樹，珊瑚盆疊元寶，一張金交椅排中央。遠月仔看 kah 目煙央，不信世間哪有 zid lūr 天堂。

「阿爸，交椅坐。」

遠月仔掠神一下看，ziah 看dirh 是尹第三 zābokyá 踦 dīh hia，頭梳大頭鬃，金鳳釵，碧玉簪，耳勾金鯉魚，紅襖繡牡丹，柘榴裙、靘色蔻，金勾鞋仔鴛鴦粧。

遠月仔自安呢 dùah le 蛇郎君尹兜，hōh 尹 zābokyá le kāh 伊奉待，早頓真珠粥、瑪瑙凍，中晝時仔白米飯，鮑魚刺參龍蝦絲，暗頓腰內肉、猪腳魯，半暝仔佫八寶湯、齒酥餅。逐日洗面金雕盆，面巾絲羅織，小解用玉壺，廁所用金棓。遠月仔不甘用，kāh-i 偷 zah le 袋仔底。

時間 le 過真正緊，無影無影過了一個月，遠月仔想 dirh 厝nìh ya 有二個 zābokyá，ziah cām 尹第三 zābokyá sīr-辭，beh 返去厝 nìh。

來講遠月仔返來到厝 nìh，尹大漢 zābokyá cām 第二 zābokyá 問伊講：

「阿爸你 nda 返來，小妹仔有安怎無？」

遠月仔ziah kāh 第三 zābokyá 尹兜 ê 代志，安怎 súi、安怎榮華富貴，從頭講 hōh 尹二個 zābokyá聽，佫 kāh 伊不甘用藏返來 ê 絲羅 kah 金棓提出來 hōh 尹看。

大 zābokyá cām 二 zābokyá 聽一 dirf，偷搥心肝，後悔 hid-日無嫁 hōh hid-個少年家，Ah-無榮華富貴 ê dirh是伊，煞尾仔小妹 dirh 去嫁 hōh 貧鬼。我 nda dirh 來想計智：

「阿爸，你也真正無啥肆，小妹仔嫁去 ziahnii 久，人 Gun 暝日 le 思念伊。你 nda 有去佫有返，也無 cūah 人返來頭返客，ah-無我來寫一張批，叫伊若有閒 dirh 返來 cittûr。」

「安呢上介好，ah-無你 dirh 緊寫寫咧。」

遠月仔不知 he 是計。

第三 zābokyá 接 dirh 批，歡喜大姊請伊返去頭返客。

來講第三 zābokyá 返來到厝前，大漢 zābokyá kah 開門出來接，看見小妹仔若仙女，一袾桃紅衫，金鳳釵雙旁插，真珠耳勾玉手環，心內氣 kah 擲心肝，講是天 le 作孽 mh ziah 安呢 nsyii，若無哪有 tāng hōh 伊 le 妝 kah na 阿娘。

來講第三 zābokyá 返來到厝 nìh，大漢 zābokyá 假情假意 le kāh 伊招待，心肝已經掠坦橫，kāh 尹細漢小妹仔講：

「Ah dūr ziah 嫁去十外日 niahnyā，哪會一個面仔 sefh 一領皮，咁是恁尪無疼你，生活 hōh 你 le 拖磨？」

第三zābokyá 應伊講：

「Lângh 我嫁去 hia，beh 坐金交椅，beh 睏紅眠床，三頓堝仔飯、坩仔肉，尪婿 kah Gun 疼命命。」

大漢 zābokyá 講：

「我是好心 kāh 妳講，妳哪不信，lai 去井邊照水映看覓咧，妳 dirh 知。」

來講第三 zābokyá cām 大漢 zābokyá 兩人 sīr cūa 來到沽井邊。

大漢 zābokyá 趁第三查 zābokyá 探頭入去井 nìh beh 照水映ê時，洶洶出手 kāh 伊捙落去，可憐第三 zābokyá 自安呢跋落井，去 hōh 水 kek 死。

(五)

大漢 zābokyá 自安呢裝做第 zābokyá ê 模樣，cūah 尹大漢小妹返來到蛇郎君 ê 厝。

蛇郎君看一見，大着惊講：

「呃！Dūr ziah 返去幾日仔，安怎妳 ê 面仔哪會變 kahna 米篩耑耑瘡？」

大漢 zābokyá 講：

「Ah dūr…，返去厝 dngh dirh 九降風，hōh 風砂 qau êe 啦。」

第二 zābokyá 白賊講：

「Dirf 啦，我叫伊 màih dùah 外面四過行，伊 dūr 坐 būeh dîau。」

「是安呢歟…！？」

蛇郎君半信半疑，嘛看不出此個查某人是第三 zābokyá？Ya 是大 zābokyá？煞 kāh 伊擋做伊 ê bó，hō 伊 dùah le 蛇郎君尹兜。

有一日蛇郎君 kahkī 一個 dīh 尹兜埕 nìh le 行踏，忽然間、聽見有一隻文鳥仔歇 dīh 樹仔枝頂 le 哮叫：

「蛇郎君、蛇郎君，你目睭 hōh 屎糊，būeh 認 zit 我是恁 bó，我 ziah 是恁 bó！」

蛇郎君應伊講：

「文鳥仔啊、文鳥仔！你若真正是我 ê bó，緊飛來我 ê 手頂。」

無疑悟，hid 隻文鳥仔真正飛來歇 dùah 蛇郎君 ê 手頂。蛇郎君自安呢 kāh 文鳥仔掠入去厝nìh，囥於鳥罧仔內飼咧。

Zid 隻文鳥仔頻若看dirh 大漢 zābokyá dirh 一直哮叫講：

「阿姊心肝烏漉漉！阿姊心肝烏漉漉！」

聽 dirh 安呢，大漢 zābokyá 氣 kah 擋 būeh dîau，講：

「文鳥仔疕，死鳥仔鬼，你若佫 dùah hia 烏白講，beh kāh 你掠起來割嘴舌！」

「阿姊心肝烏漉漉！阿姊心肝烏漉漉！」

文鳥仔又原 dùah hia 罵 būeh 煞，大漢 zābokyá 氣 kah 面發烏。第二 zābokyá fuah 聲講：「kāh 伊掠起來割嘴舌！」

自安呢用鉸刀 kāh 文鳥 ê 嘴舌剪 hō 斷。Mahkurh：

「啁、啁、啁，大姊烏漉心！大姊烏漉心！」

文鳥仔又原哮 būeh 煞，大漢 zābokyá 也受氣也着惊，煞 kāh 文鳥仔掟死；kāh 伊坮 dùah 厝後壁 ê 沽井邊。

過幾日，hid-個所在發一欉竹仔出來。此欉竹仔一直發，無幾日仔發 kah 長長長。大漢 zābokyá kāh-i 斮起來，提去做一塊竹椅仔。

講你嘛不信，zid 塊竹椅仔竟然會講話：

「郎君坐 dirf 真心爽，大姊若坐 beh hōh 你踚踚碢！大姊若坐踚踚碢！」

講你嘛不信，聲實蛇郎君坐 dirf 搖搖爽，大漢 zābokyá 若坐落去 dirh 踚踚碢。大漢 zābokyá 真受氣，煞 kāh 竹椅仔摃摃破，佫 kāh 伊撣落去灶孔內，點火 kāh-i 燒 kah 偆一堆火灰。無若久 zid 堆火灰恬恬仔變做一塊粿，大漢 zābokyá 尹都攏不知影。

拄仔 hid-zūn’na，過壁有一個阿婆過家 beh 來引火，大漢 zābokyá 叫伊 kahkī 去灶腳引 dirh 好。

阿婆入去灶腳 beh 引火 ê 時，看 dirh 灶孔內有一塊粿。阿婆想 kong 若會 ziahnii 烏賚，若會 kāh粿囥 dùh 灶孔內煞放 būe 記 zid，去 kāh 大漢 zābokyá 講：

「恁灶孔內哪會有一塊粿？」

「哪有啊？灶孔內 beh 哪有啥乜粿。若有 hōh 你啦。」

大漢 zābokyá 應阿婆安呢講。

阿婆引了火，想 kong 伊 dūr 安呢講啊，嘸 dūrh kāh 伊提返 lai hōh 尹孫做點心，順手 kāh 彼塊粿suah 提返去厝 nìh，kāh-i 用棉被掩咧。

等尹孫返來，阿婆 kāh 尹孫講：

「腹肚若枵，棉被內有一塊粿 dīh 咧，你去提來食。」

阿婆尹孫誠歡喜，緊走入去房間內，hen qui 棉被一下看，看 dirh 一個真 súi 真súi ê zābogin’na 坐 dīh hia。

阿婆尹孫 dirfh 一惊，緊走去 kāh 尹阿媽講：

「阿嗎、棉被內有一個 zābogin’na，有一個 súui zābogin’na！」

「愩孫兮，你 mh le 講愩話，你咁 būeh 記得咱兜 kānnā 有你 kah 阿嗎兩個人 niahnyā？Aa 有啥乜 súui zābogin’na？」

阿婆 na 講 na 緊來房間一下看，真正有影，有一個 zābogin’na sui-sui-súi，坐 dīh 尹兜 ê 眠床頂 le cngh-cngh 哮，kāh 阿婆講伊是隔壁蛇郎君 ê bó，hōh 尹大姊害死，變做一隻文鳥仔，變做一枝竹仔，佫變做一塊竹椅，ziah 佫變倒返來做人，拜託阿婆且 hōh 伊 dìamh dùah 阿婆尹兜，màih 講hōh 尹蛇郎君知影。

數日後，蛇郎君身騎白馬對阿婆尹兜門口經過，看見阿婆尹兜坐一個查某人真正 súi，行偎去一下看，惊一抖：

「噯呀！哪會ziahnii 親像，親像 Gun bó 進前安呢！」

蛇郎君心內拄 le 安呢想，聽見 hid-個查某人講：

「咁親像 niahnyā！我是你 ê 真正 ê bó。Hōh Gun大姊捙落去井內 kek-死，變一隻文鳥仔佫 hōh 伊割舌、掟死；ziah 變做一欉竹仔，佫 hōh 伊斮起來燒做一堆火灰，ziah 佫變成一塊粿，最後 ziah佫變做人來，dīh zia hām 你 sīr 見。」

蛇郎君起頭 ziah 知影過去 ê 代志，ziah cūah 伊逗陣倒去厝 nìh。

續講蛇郎君 cūah 伊返來到厝 nìh，真受氣，beh kāh 大漢 zābokyá cām 第二 zābokyá 趕出去。大漢zābokyá 尹死都不認罪，一直講伊是第三 zābokyá，講伊z iah 是蛇郎君 ê 真正 ê 查某人。

蛇郎君想來想去，ziah 講：

「Ah-嘸，來安呢：Zia 有一堆鴨卵，看恁三個啥人若跳會過 ê 人，dirh 是我 ê 真正 ê bó。」

Nda、第三 zābokyá 生做窈窕佫 tīaulāng，輕輕仔一下跳 dirh 跳過鴨卵堆。大漢 zābokyá cām 第二zābokyá 自從來到蛇郎君尹兜，食好睏好，貪食貪睏，規個人肥 hām-ham，大 qo 佫笨偒，跳 būeh 過鴨卵堆，頭殼碰 dirh 地，煞 sak 死去。

自安呢，遠月仔 ê 第三 zābokyá cām 蛇郎君兩個人，ziah 佫再回復尹咏日仔 hid-款快樂 ê 生活。牆仔內 ê 花又佫開 kah 滿滿是，紅花、白花 kah 黃花，嘛有紫色 ê 花。

一陣蜜蜂飛來嗡嗡叫，講：

「哼、哼、哼、有一個少年家，beh 娶姑娘仔來做 bó，鳳冠戴、紅蟒襖于士裙繡鳳凰，紅頂駟轎八人扛，連炮仔 vình-viàngh 叫，古吹 nhyī-nhā 叫，beh 請姑娘仔來上轎」。

一陣文鳥仔歇 dīh 厝角頭 le zifh-ziufh 叫，講：

「蛇郎君騎白馬，白馬掛金鞍，金鞍雕纓絡，咸瓏叮噹叫，金鳳釵，碧玉簪，耳勾金鯉魚，紅襖繡牡丹，柘榴裙、靘色蔻，金勾鞋仔鴛鴦粧，秀姑巒 ê 華舞琅啊，華舞琅 dīh 秀姑巒。」

TOP

-------------------------------------------------------------------------------------------------------