。

³

(一)

風真大，叨 ziah 新曆 ê 十月尾仔，農曆 ê 九月中仔 niahnya，對高壁吹來 ê 西北風，掃過海峽，吹對福島 ê 每一個角落來。 對喜樹仔續來 ê 七個沙島排做一列，親像七隻海尪浮 dīh 海頂。下晡時仔日頭，紅紅掛 dīh 西旁天，海島城 ê 紅磚仔壁 hōh-i 照 kah 臭焦紅去，城樓 ê 旗竿尾頂彼支紅、白、藍 ê 三色旗 hōh 風搧 le pet-pet 叫。

風湧一波又一波，cîangh dirh 大員 ê 沙坪，化成白色 ê 水花四散去。沙坪腳有二個荷蘭士官 le 指揮十幾個明國 ê 工人，用茄萣樹枝 kah 蚵殼仔灰 le修築海島城 ê 地基。戰船 Grol 號拋碇停歇 dīh 海翁窟 ê 深澳；快艇Daman 號參 Brdammer 號停歇 dīh 海島城腳凹灣 ê 碼頭，hōh 幾欉仔阿猴樹半遮咧；幾隻仔戎克船停歇 dīh 靠近赤崁彼旁 ê 岸邊。

Grol 號是一隻加禮翁船，兩旁各有 120 支櫓和 30 門大砲，三日前ziah 對巴達維亞載 50 個士兵 kah 一寡仔補給品來到大員，三支白色的帆桅都猶未收拾好勢。

快艇 Daman 號參 Brdammer 號 dīh 頂日仔奉派去北方塭港灣 ê 福星堅砲台巡邏，昨日歸隊返來，照商館長官 êh 命令，kā 福星堅砲台所有 ê 舢舨仔船，攏總 18 隻，順路載返來大員。Zim'ma 合大員所有 ê 50 隻，攏總 68 隻舢舨仔船，緊急動員排囥 dīh 海島城腳、面向鹿耳門水道 ê 岸邊。

又佫是一日， 1637 年 10 月 24 日 ê 下晡時仔，對達瑪仙山 (玉山) 昇起 ê 日頭，已經斜西，對城樓 ê 圓窗照入來。大員 ê 商館長官范登堡踦(qīa)  le 圓窗仔前，用眺鏡看 dirh 一隻漆紅柑仔色 ê 舢舨仔船，載尤紐士牧師和 (hām) 二個跟隨 ê Formosa’a 順民，駛對鹿耳門水道入來。

「尤紐士也來啊…！」

范登堡嘴 ni na 呶 (nauh) na kā 伊 ê 眺鏡交  hō 身邊 ê 服務官，轉身行對樓梯落來，入去坐 le 長官辦公室，le 等尤紐士牧師。

看 dirh 尤紐士牧師家己一個行對長官辦公室入來，范登堡趕緊起身起來，出聲講：

「尤牧師啊！Zidlūr 天，是啥乜風 kāh 你吹來 ê？請坐！請坐！」

「Bōe、bōe、bōe，託神 ê 庇佑！」

范登堡 kā 尤紐士牧師 cūah 來到一塊長桌仔邊，二個人面對面坐 le 兩旁。尤紐士牧師講：

「長官閣下，hōh 我先 kā 你報告一下，頂日我有接 dirh Pieter 中尉轉來你 ê 密信，照閣下 ê 交帶，去咂 (qo) 集一寡仔 Formosa’a 順民 êh 代志，現在已經有各社 ê 戰士，包括 200 個新港人、150 個目加溜人、330 個蕭壟人、540 個麻豆人 kah 180 個猪羅山人，攏總 1400 個人答應願意聽長官閣下差教，為公司戰鬥！」

「哦，真好！Mhkurh，你想，ziai 野蠻人咁會靠得？」

「若這，安啦！攏嘛是 hiai le kāh 咱通風報信 ê 人 dàuh 咂來 ê，我保證無問題啦。」

「若安呢真好！多謝你對公司 ê 盡力，等若凱旋返來，我一定會 dīh 咱 ê 海島城日誌，清楚記述你 ê 名字 kah 你對公司 ê 第一等功勞。」

「無啥乜啦！你 mài 安呢講，攏嘛是得 dirh 神 ê 幫助，kah 長官閣下 ê 威力，才會 dàngh hōh hiai 野蠻人變做公司 ê 順民，為公司出力拍拼。這以外，我答應來參加 ê 人攏 beh hōh 尹 十 二兩鹽；攻入 he 富裕 êh 華武浪大庄 êh 時，允准尹會 sái-得盡量搶提尹所愛 ê 物件；准尹 kāh 敵人 ê 首級提返去做戰利品，hiai Formosa’a 順民 dirh 歡喜 kah 三腳花跳啦！」

「哦！安呢，… ah，集合 ê 路線，你咁有計畫好勢？」

「有，有！都攏約好勢啦…，ia kurh 有一件代志，beh 請問長官閣下，頂 19 日，我照閣下 ê 命令，帶領 Jan Juriaense 隊長參 25 個士兵，駛二隻舢舨仔船去探查塭港北旁彼條笨港溪 ê 水道，已經 dīh 21日 kāh 探查得 dirh ê 情形 kah 地圖交 hōh Juriaense 隊長提來 hōh 長官閣下，不知你有收 dirh ia 無？」

「有，我有收 dirh，福星堅砲台 ê 指揮官嘛有送一份根據當地人所講ê 報告來。昨昉咱商館 ê 議會根據你 ê 探查 kah 福星堅砲台 ê 指揮官 ê 報告，本來決議 dīh 這 26 日 beh 出兵去攻打 hiai 可惡 ê 華武浪人。不過，我看 zid 款天氣，風勢當好，準備也都攏好勢啊，zim'ma 拄你也來啊，我決定提早，明仔早起 dirh beh 發兵 lài 去。」

「安呢真好！靠神 ê 庇佑，lài kāh hiai 可惡 ê 華武浪人 pah kah hōh-i 落花流水，得勝返來！」

「安呢，zim'ma 我 beh 借尊貴 Orange ê 名義，命令你尤紐士牧師帶領 hiai 你咂集來 ê Formosa’a 順民，dīh 28 日 ê 日落以前，來到笨港溪口 ê 一座蔦松林內會合，千萬 būe-用得延誤 ia 差錯。」

    會談結束了後，尤紐士牧師行出海島城，參二個跟隨 ê Formosa人，坐原來 ê 舢舨仔船，駛對鹿耳門水道出去，才 kurh 食北駛入北旁 ê 一條無名溪，dīh hia 上陸，用行 ê 來到目加溜灣 ê 時，日頭 giôngh-lip-beh落海。緊叫二個跟隨 ê Formosa人，趕緊去通知各社 beh 來參加出征 ê 人，改 dīh 明仔 ē-hng 來麻豆社集齊。

伊家己才 hōh 駐守目加溜灣 ê 下士長  kah 伊 cūah 路，騎馬來到麻豆社教會 ê 時，已經是半暝啊，佫緊叫一個瑪搭透暝去猪羅山社，去做仝款 ê 任務。照尤紐士牧師 ê 計畫，beh 先 kāh hiai Formosa’a 戰士集來麻豆社，beh 對另外一條陸路，趕去笨港溪口 ê 蔦松林，參荷蘭軍會合。

這一暝對大員商館 ia 是遠遠 dīh 北方 ê 華武浪人來講，攏是一個無尋常 ê 晚暝，海島城 ê 燈火規暝光 lang-lang，借尊貴 Orange ê 名義，范登堡長官發出一級動員命令。

〈繼續〉