(三)

華武浪大庄 dīh 笨港溪 ê 北旁邊，是 hōh 華武浪溪 kah 卒峇(zudba) 溪包咧 ê 一個溪中島，bih dīh 綠色 ê 樹林 kah 白色 ê 砂崙中間。南旁向是一遍平坦 ê 田園；有一條灣灣曲曲 ê 華武浪古道 uih 大庄 ê 下路頭， 跘 (pwâ) 過華武浪溪，經過 zim'ma ê 番仔溝、車巷口、水燦林，tàngh 到笨港溪口 ê 下蔦松。華武浪人講：踦-i 下蔦松，有聽見塭港人 le 牽罟 ê 聲，嘛有看見蚶仔寮人 le tēg 竹棑仔；若好天時，仰頭有看見白色 ê Tamasen 山  (玉山 )；看會 dirh 半天嶺頂 ê 人 le 燒菅蓁 ê 白煙 sūan 對藍色 ê 天尾頂 qidlìh；有聽見遠遠仔飼牛 gin'na le 趕牛 ê 聲。

華武浪大庄是一個大庄社，有 3,500 個庄民，kah 1,200 間家屋，由華武浪王阿敏 kah 七個長佬 cām 十二個議員 le 統治。有一個尪姨婆─達瑪里嘛李．阿甘瑪 le 管理庄中央 ê Tamagisangah (達瑪祖仙) 神殿。

管內有 24 個小庄社，分別由 24 個頭人  le 掌管。有 2,400 個勇士，由嗒瑪哩．瑪悟  le 總掌，分做東、西、南、北四個營 le 保衛華武浪大庄 ê 安全。有一個詩仙瑪雍 le 負責教 gin'na ê 代志，kah 主持查甫 gin'na 成年做瑪搭 ê 儀式。

Tamagisangah神殿 hoksāih 一位 Tamagisangah kah 三位南方 kah 北方 ê 神。華武浪人相信 dùah dī 東方蓬萊仙山 ê Tamagisangah 是尹 ê 祖媽神，創造天地 kah 華武浪人；南方 ê Tekarpadasangh 是一個和平美麗 ê 神；北方 ê Tapatiapsangh kah Akafuttasangh 是二位戰神，一個 giáh 弓、一個 giáh 箭。

佫有一個「復仇 ê 神」名叫 Sarasanosangh，是海神 Hainagon ê kyá，dùah dī 北海海底國 ê 烏色 ê 日頭頂面，手 giáh 一支黃金色 ê 丈二鏢槍，對 hiai 欺壓華武浪 kah 猥褻 (uèhsè) 祖靈 ê 歹徒，kā-i 報復，取人 ê 生命。華武浪人世代傳說：Sarasanosangh bat dīh 三百年前現身一擺，制出伊 ê 黃金色鏢槍，殺死 hid 個對西方歹 孔 (khāng) 地來，霸佔華武浪土地，欺壓華武浪人 ê 惡魔 Paibosloan。 

自從 1624 年 ê 春天，荷蘭人來到大員設立商館以來，華武浪王 dirh 一直 le 注意 zid 群黑衫紅褲，猫仔目、佫紅頭鬃 ê Azjiesloan (外邦人) ê 動靜，派人去大員 le 探聽。

彼 zūn'na，島上 ê Formosa’a人雖然有差不多相仝 ê 語言、文化 kah 信仰，生活習慣嘛叨也差不多，拍算因為 zid 個島太豐富啦，不免為 dirh 生活拼生拼死；佫無出產製造刀劍 ê 青銅 kah 鐵，因為安呢，mh-bat 發生大量殺人 ê 侵略戰爭；萬古以來 mh-bat 形成做統一 ê 政治體。Kānnā 受天然 ê 地理環境、hōh 溪水區隔做九個部落型 ê 地區。為 dirh 荷蘭人來大員設立商館，本來各人顧各人 ê 關係發生改變，南北各地 ê 頭人 ziah 開始有 le 相探聽；hōh 人煩惱 ê 消息一項一項傳對華武浪來。

起初，茍而荷蘭人 kānnā beh 設一個商館來 cām 日本 kah 明國做生理 niahnyā，哪知煞 dīh 大員建設一個海島城，駐守一隊兵馬 kah 大砲，佫有幾偌隻戰船停泊 dīh 海翁窟，kāh 赤崁社 ê 人趕走去新港，派軍隊去強迫新港社 ê 人承認受尹管轄，納尹 ê 稅，替尹做勞工；每年白白收去 20 萬領鹿皮，kah一大堆鹿肉干 kah 烏魚干；hōh 華武浪王阿敏愈來愈感覺不安起來。

對荷蘭人 ê 惡行，華武浪 ê 尪姨婆-阿甘瑪預言講「菜虫食菜、菜腳死」，祖靈一定會叫尹付出代價。1625 年 9 月，有一個去新港社返來 ê 人講：商館 ê 第一任長官宋克受達瑪祖仙 ê 責罰，無緣無故，píing 船 kek 死 dùah 海翁窟。韋特 ziah 接任做第二任長官。

1627 年 ê 三月節後，新港人常常看見一個 20 歲出頭仔，身材 kūan-大，包頭，穿一領烏色 ê tagayang (背心夾克)，kah 一條 紺 (qóng ) 色 ê 霜降褲柱，腰 ni 縖 (hâ) 一條茄萣色 ê 絲仔腳巾，一看 dirh kah 在地 ê 新港人有一 些 (sut) 仔無仝款 ê 瑪搭 (男生)，踦 dīh 五條港尾 ê 海岸邊，le 觀察對旁岸 ê 北線尾 kah 大員彼旁。

此個瑪搭不是別人，正是華武浪王阿敏 ê 候生：達瑪里•阿木，hōh尹父親派來藏 dīh 新港社 le 探查荷蘭人 ê 動靜，dīh 這二月底 dirh 單身匹馬來到新港社，有一個麻豆社 ê 頭目 Taccaran kā 伊逗安排，dùah dīh 一個新港人 Abunkoa 尹兜。此個 Abunkoa 本 zyâ 是一個鹿皮販仔，le 收集鹿皮賣 hōh 日本 ê 生理人；講少年時也 bat 做過海賊林鳳手下 ê 櫓手；自從荷蘭人來到大員了後，生理無做啦，家己一個 dùah le 庄仔外靠近五條港尾 ê 宅仔內。

Hid 個 5 月，大員發生一件重大 ê 代志；舊年 10 月，日本國 ê 長崎代官Suetsugu-Heitsou (末次平藏) ê 朱印船來到大員貿易，新來 ê 第四任商館長官努易茲要求納稅 ziah 肯放尹離港。朱印船 ê 船長 Hamata-Yahee (濱田彌兵衛) 辯解講：尹比荷蘭人卡代先來到大員，日本人dīh 大員應該有特別 ê 權利，拒絕繳稅。努易茲下令沒收 Hamata ê 一部分貨物，雙方 dúu-dêg 到 zim'ma，Hamata 已經柴空米糧盡，困 dùah 大員港內，無法度出帆返去日本。

Tamati nau Dicka本 zyâ 是赤崁社 ê 頭目，1624 年  hōh 荷蘭人趕去 dùah dīh 新港社，對商館 ê 所作所為真正痛恨，想  kong 這是一個好機會，若會 tàngh 幫助 Hamata 返去日本，請日本 ê 武力來 kāh 荷蘭人趕走，伊 kah 伊 ê 族人 dirh 會 tàngh 佫倒返去赤崁社，所有 ê Formosa’a人嘛免佫 le hōh zid 款 Azjiesloan le 糟蹋欺負。

Dicka 秘密咂集 12 個新港人，合伊家己攏總 13 個人，秘密去見 Hamata，kāh 伊 ê 計畫講 hōh Hamata 知影。Hamata 同意 Dicka ê 計畫，約定機會若到，同齊行動。

Abunkoa 耳風仔聽 dirh Dicka ê 計畫，趕緊報 hōh 阿木知影，cūah 阿木去拜會Dicka。詳細聽過 Dicka ê 計畫了後，阿木決定嘛 beh 參加 Dicka ê 行動。

彼個 5 月尾，阿敏王接 dirh 消息講：阿木 beh kah Dicka 逗陣去日本；講 ia 有一個枋山社 ê gin'na 叫做 Tama kou Alat (阿力) 也 beh 參加，講彼個阿力 zim'ma ziah 14 歲，是 Takalian ê 頭目 Tama kou Taalo ê 獨生子，Taalo 為 dirh 不服荷蘭人，hōh 荷蘭人殺死，尹母仔惊仔荷蘭人佫對阿力不利，放 hōh 阿力 kāhkī 一個逃走，流浪來到新港社，遇 dirh Dicka，kāh 伊收留 dùah dīh Dicka 尹兜 ê。

Zim'ma 佫 kē 阿木 kah Abunkoa kah 彼個枋山 gin'na，攏總 16 個人，趁 zim'ma 拄月暗暝，利用 Abunkoa 尹兜厝前 hid 條五條港 ê 水路，偷偷仔先 kāh 食糧 kah 水運搬去朱印船，準備隨時會 tàngh 出帆。

6 月29 日 ê 半晡時仔，一切 ê 準備都攏完成好勢。等 kah 日拄暗 ê 時，16 個Formosa’a人也攏總來到船頂。

仝 zid 時 zūn，另外二個提火刀石 kah 芒硝 ê 新港人，已經摸來到赤崁社，kāh 荷蘭人新企 ê 倉庫放火。

無若久，海島城 ê 值官接 dirh 守望 ê 報告，講是赤崁彼旁 ê 倉庫 le 焯 (turfh) 火，緊派大批人馬，有人 beh 去拍火，有人 beh 去維持特序。趁規個海島城亂抄抄 ê 時，Hamata ê 朱印船偷偷仔溜出鹿耳門水道，來到外海 ziah 昇滿全帆，向北方行進，等荷蘭人發覺 ê 時，朱印船已經航行來到馬沙溝外海。荷蘭人雖然有幾隻快挺，不過，努易茲心內想講；朱印船頂已經柴空米糧盡，放 hōh 伊離開大員，伊咁 lēh 有法度平安返去到日本？因為安呢，無命令 hia ê 快挺去追。

二日後，消息傳返來華武浪大庄，阿敏王知影日本船已經成功載 阿木尹一行人出帆倒返去日本，緊備辦檳榔 kah 水酒去祭拜祖靈，祈求海神 Hainagon 庇佑尹一行人 ē-dàngh 平安去到日本國，達成計畫倒返來。Mhkurh，尪姨婆阿甘媽婭預言講：Hiai Azjiesloan 是 Battameh’ya ê 化身；意思是講：用人 ê 力無法度 kāh 尹消滅，kānnā Boesum(天) ziah 有法度 kāh 尹趕走。

Dīh  he 七月尾，朱印船載 dirh 阿木 kah  Dicka 尹 16 個 Formosa’a 人來到日本國，駛入長崎港。

得 dirh 長崎代官 Suetsugu-Heitsou ê 協助，中秋 hid 日，阿木 kah  Dicka 尹一行人來到 SURUGA (駿河)  覲 (kyì) dirh 幕府大將軍德川家光。Mhkurh，zidzūn-仔拄仔離日本國發出第一次鎖國令 ê 三年前，幕府已經漸漸 le 實行鎖國政策，德川家光對大員 ê 荷蘭人顯然無啥乜興趣；對 ziai「高山國」人 ê 請求，無表示好 ia 是不好，kānnā 賞 hōh 尹一可仔 Asoso (贈送品)，dirh 叫尹倒返去長崎。濱田 cām 荷蘭人 ê 貿易糾紛，嘛叫長崎代官自己去處理 dirh 好。

返來到長崎了後，Hamata 想 dirh 頂回 ê 損失，愈想愈不甘心，決定 beh 佫 去 kah 荷蘭人拼一個條直，dīh  he 隔返年 ê  4 月尾，又佫帶領二隻朱印船 kah 四百外個水手，載 阿木 kah  Dicka 尹一行人，來到大員。  

有一個明國人 ê 水手偷偷仔離船去密告 hōh 荷蘭人知影，引起荷蘭人登船搜查，果然發現船頂藏 dirh 阿木 cām Dicka 尹 16 個 Formosa’a 人，佫有大批武器 kah 火藥，自安呢 kāh 船頂 ê 武器 kah 火藥攏總沒收，kāh Hamata kah 跟隨 ê人解除武裝後，留置 dùah 大員，mh-准 hōh 尹離開去。

阿木 kah Dicka 尹一行人，嘛 hōh 荷蘭人押入去海島城拘禁起來，佫 kāh 日本將軍送 hō 尹 ê Asoso 沒收去。Zuai Formosa’a 人流落 dùah 日本國半年， 躩 (qàng) 都躩 būeh 得返來，ah dag zim'ma 踏 dirh 父母 ê 地，煞顛倒變成荷蘭人 ê 囚犯。

講 ziah le 講，zid 擺 zid 個日本鱸鰻 Hamata 是有準備 ziah 來 ê， 6 月 29 日 ，cūah 12 個跟隨 ê人，突然間衝入長官辦公室，kā 努易茲挾持起來。奴易玆 ziah 屈服，cām Hamata 簽訂協議，賠償 Hamata ê 損失，保證 hōh  Hamata 安全離開大員；佫釋放拘禁 dīh 海島城內 ê 16 個 Formosa’a 人，退還 kāh尹沒收 ê Asoso。

七月七日 ，濱田釋放奴易玆，啟帆離開大員返去日本。阿木 cām Dicka 尹 ziai 16 個 Formosa’a 人得 dirh 自由了後，各人返去各人 ê  Don；二日後，阿木嘛返來到華武浪大庄。

Hamata 離開大員了後，奴易玆見羞反受氣，下令四界追掠 ziai 偷渡去日本 ê Formosa’a 人。Dicka 尹 13個新港人自安呢四散，有 ê 走去 bih dùah 大武壟，有 ê 走去 bih le 哆囉嘓。奴易玆追掠無人，掠新港社 ê 頭人去迫問 Dicka ê下落，迫伊交人出來。新港社 ê 頭人牙齒根咬 le，不肯講出來，奴易玆無法度，最後 kā  Dicka 尹一行人 ê 厝放火燒燒 le ziah甘願。佳哉，荷蘭人不知阿力是 Takalian 人，ziah 無追 kah 枋山 ê 厝 ni 來。Abankoa cām 阿力走去 bih dùah  麻豆社，去依偎 Taccaran，無若久 Abankoa dirh 病死 dùah 麻豆社。  

日子過得真緊，阿木返來華武浪大庄已經經過一年外。

彼年 ê 8 月初，有一個對麻豆返來 ê 人講：頂個月 ê 13 日，麻豆社發生一件大代志，講：二年前安排阿木去 dùah dùah 新港社 ê Abankoa 尹兜 hid 個麻豆社 ê 頭目 Taccaran，本 zyâ 原仔計畫 beh hām 阿木 kah Dicka 尹逗陣去日本，因為走漏消息，去 hōh 甘迪留斯牧師知影，顧 dirh 其他人 ê 安全起見，放拺計畫無去；為 dirh 此件代志，甘迪留斯常常強迫伊 le kā 荷蘭人服務。頂個月 ê 13 日，奴易茲派尹 ê 指揮官 Jacob Hooman  cūah 一個下級商務員 kah  61 個士兵，深入麻豆社，要求 Taccaran 協助 beh 擒掠海賊劉香 ê 手下。

彼個 Abunkoa ê 朋友 Taccaran 假佯認真 kā 尹協助，暗中派人利用荷蘭人對地頭無熟，cūah 荷蘭人四界走尋海賊，等 kah 黃昏暗仔，beh 倒返去 ê 半路， 馱(dûr) 荷蘭兵過麻豆溪 ê 時，奪取荷蘭兵 ê 火鎗，kā 63個荷蘭人通通 cīa 落去 hōh 溪水淹死。

為 dirh zid 個事件 cām Hamata ê 代志，奴易玆 hông 免職去，佫 kāh 伊送去日本國 hōh 日本人做人質，hông 監禁 dùah 長崎 ê 出島監獄；改派普特曼來接任做第四任長官。  

普特曼長官上任以來，一來做一下損失 63 個兵員，元氣大失，二來為  dirh cām 日本國貿易 ê 問題，佫有海賊李魁奇 hām 鄭芝龍 dīh 海頂 le kah 伊做對，búu kah 無力、也無時間 tāng kah Formosa’a 人盤撋。

天真 ê Formosa’a 人茍而這新來 ê Marais o cho (侵略者) 已經改邪歸正，būe 佫再親像以前安呢四界 le 欺壓人，歡喜 kah dīh 神廟頭前 le 搬戲、fuah 咻 ê 時，阿甘瑪預言講：戰神已經降落凡間，戰爭 lip-beh 來啊！

彼年 ê 8月 15 走標 hid 日，華武浪大庄 ê Tamagisangh 廟前 又佫 le 搬 Nainai-

giowa，大聲 le fuah La nesoneso ê 時，眾人看 dirh 北方 ê 天頂 lak 落二粒 làuhsái-星。阿甘媽又 koh 預言講：戰神 Tapatiapsangah kah Akafuttasangah 已經降落凡間，戰爭 lip-beh 開始啦！

等 kah 1633 年尾，頂面講 ê 問題都攏解決，普特曼 dirh 向巴達維亞 ê 總公司請求援兵，計畫等援兵若到，dirh beh 去攻打麻豆社，來報復麻豆人淹死 63 個荷蘭人 ê 深仇大恨。

普特曼足足等了二年，一直等 kah 1635 年 ê 春天，巴達維亞 ê 援兵 ziah 來，立刻對麻豆社發動報復性 ê 攻擊，殺死 260 個麻豆社戰士，放火燒毀所有 ê 房屋。形勢所迫，麻豆社人派人獻檳榔 kah 椰子樹栽，表示投降接受荷蘭人 ê 統治。

Taccaran cūah 阿力逃走去 bih le 哆囉嘓，ziah 佫輾轉走去 bih dùah 大武壟社。一年後，阿力家己一個 bîh 倒返去尹故鄉 ê 枋山社。

普特曼看無後顧之憂啦，自安呢大膽發兵去攻打北方 ê 哆囉嘓 kah 猪羅山社。到 zia，荷蘭人事實上已經控制笨港溪以南 ê 全部土地 kah 住民。

下一個目標當然 tióh 是華武浪啦！

1636 年初，阿木接 dirh 塭港來 ê 消息：荷蘭人 dīh 塭港趕工 le 建設一個砲台，講：此個福星堅砲城企 dīh 塭港溪口 ê 一塊沙洲頂面，離笨港溪南岸五、六公里 ê 所在，beh 做後日仔進攻華武浪 ê 中途站。

塭港灣 kah 北港灣事實上是仝一個大海灣，中間 hō 突出 dīh 笨港溪南岸出海口 ê 屯仔頭隔做隔界，灣 ê 外口有幾若塊沙洲浮 dīh hia；麻豆溪 kah 塭港溪分別對塭港灣 ê 南旁 kah 北旁流入塭港灣。北方 ê 笨港溪 kah 華武浪溪，分別對笨港灣 ê 南旁 kah 北旁流入笨港灣。事實上荷蘭人已經來到華武浪 ê 門腳口，佫 dīh 華武浪 ê 門腳口建設一個砲城。

11 月，征服華武浪 ê 夢 ia būeh 完成，普特曼長官 ê 任期 dirh 屆滿，巴達維亞 ê 總督派范登堡來接替大員商館長官 ê 職務。阿甘瑪又佫咒 讖 (càm) 講：「菜虫食菜，菜腳死」，19 日普特曼坐船 beh 經由巴達維亞返去尹祖國 ê 時，半路 tngh dirh 海賊攻擊受傷，返去到阿姆斯卓丹 dirh 病發死亡，結束伊殘忍 佫罪惡 ê 一生。

這新來 ê 范登堡長官拖延到隔轉年 (1637) ê 正月 ziah 來到大員上任，dirh 按照前任普特曼長官 ê 計畫，積極 le 準備 beh 進攻華武浪。  

華武浪此旁嘛一直 le 探查商館 ê 動靜。

彼年 ê  9 月初，阿木接 dirh 消息講：有人看見 2 個明國人侵入華武浪 ê 土地 le 探查華武浪溪渡口 ê 深淺。仝 hid 個月尾，又 佫接 dirh 消息講：有一個紅頭鬃 ê 牧師 cūah 十四、五個荷蘭兵 dīh 屯仔頭 le 探查笨港溪 ê 水路。

佫隔轉年 ê  2 月，南旁西庄 ê 頭人Tama Lin Atang 掠 dirh 二個「別所仔」來覲阿敏王，講：此二個「別所仔」侵入華武浪 ê 土地 le 探查華武浪溪渡口 ê 深淺。

阿敏王想 kong 這可惡 ê 荷蘭人，叨也無 kong 無啥無代 dirh 起兵來 pah，攏是等 kah 對方有啥乜仔差錯 tāng 做藉口 ê 時，dirh 賊卡 ok 人。為 dirh màih hō 這奸詐ê 紅毛人起  qang 起 sún ê 藉口，叫 Atang  kā 彼二個「別所仔」趕出台仔窪 dirh好，不 tāng  kā 尹傷害。又佫再三吩咐華武浪 ê 人，不 tāng  kah 溪南 ê 人發生事端，若無要緊 ê 代志，盡量 mài 過笨港溪去，看會 tàngh 避免 zid 場戰爭否！不過，伊心內明白，zid 場戰爭恐惊仔無法度避免。

照過去 ê 經驗，荷蘭人都攏 dīh 十一、二月仔以後 ziah 會出兵。因為冬天時仔野外雜草 dālen 去，四界卡光 閬 (lang)，卡 būeh 中 dirh 敵人 ê 埋伏；ia佫、溪水也卡淺，卡好行軍 ê 關係。阿敏王料算荷蘭人若會來，嘛咧等到十一、二月仔 ziah 看會來 būe？

Hōh 阿敏王料算 dirh，范登堡長官除了 ziah 新就任，華武浪 ê 情形無真清楚，須要先了解一下，所以三番兩次派人來 le 探查；嘛確實 le 等冬天時仔 ziah  beh 出兵。因為普特曼 beh 卸任 ê 時有交帶，叫伊 dirh 記得 1629 年 7 月，63 個荷蘭士兵  hōh 麻豆人殺死 ê 教訓；彼 zūn'na，奴易茲犯 dirh 一個重大 ê 錯誤；七月對 Formosa 島來講，是雨期 ê 正當中，草 kûan 水也深，對外地來 ê 人極度危險。

雖然是安呢，荷蘭軍 dāng-時仔 beh 來，實在講，真歹料算，嘛是 dirh 準備萬一，保護庄仔人 ê 生命上要緊。

是 kānnā，感覺今年 ê 天氣有卡反常，春天無親像春天，三月叨 ziah 過，對台仔窪 hid 旁起一陣鼠尾風，Tamagisangh 神廟 ê 翹角 hōh-i 捲一半去。續落去，五月起大雨一直落無停，落 kah 笨港溪水暴漲氾濫，草湖、樹仔腳到土間厝一大遍田 hōh 大水淹淹去；華武浪溪 ê 溪水嘛漲 kah 溪岸 kûan，tàngh 到西旁 ê 大牛埔潭，規遍攏是水。

阿敏王仰頭看天，歡喜 dīh 心肝內，想 kong zidlūr 雨若繼續落到冬尾，荷蘭軍 dirh 不敢 beh 進兵來。Mhkurh 華武浪 ê 人叫苦連天，講：雨若落 mh-煞，無去 hōh 可惡 ê  Azjiesloan 呯 (pòng) 死，會先 hōh 大水淹死。阿甘瑪又佫預言講：這是戰神  le 磨箭 ê 水，講：戰神 lip-beh 大開殺戒啦！

天公 mh-從阿敏王 ê 心，到 7 月初，戰神突然停止磨箭， 頑 (bân) 雨恬去，續落去是日日晴空萬里，炎天赤日頭， 暑 (loáh) kah 溪仔水 le 嗆煙。到 7 月中，笨港溪 kah 華武浪溪 ê 水攏退 kah 偆腳頭窩深。

Hōh 阿敏王上煩惱 ê 是，今年 ê 秋天即呢緊 dirh 來，走標叨拄 ziah 過，九降風 dirh sú-sú 叫，飛沙走石，規個華武浪 hōh-i 摳 (qau) le 硞硞 zùn。夜暗暝，圍仔內 ê 竹模 hōh 風掃 le 咿唓 (way) 叫；對海口仔港傳來 ê 海吼聲，kahna 地獄 ê 魔鬼 le hāycan，一 zūnh 一 zūn，對土腳底發出來。

〈繼續〉