烏色 ê 日頭

(二)

1637 年 10 月 25 日 ，荷蘭東印度公司大員商館 ê 第五任長官范登堡，講為 dirh beh 懲罰可惡 ê 華武浪人，帶領荷蘭艦隊 hām 300 個士兵，會合尤紐斯牧師咂集來 ê 1,400 個 Formosa’a 戰士，beh 去攻打笨港溪北方 ê 華武浪大庄。

范登堡 ê 兵馬分做四隊，每隊 72 個人，坐 68 隻舢舨仔，天 beh 光 dirh 對大員出發，向北航行 3 點外鐘後，來到馬沙溝靠岸歇困過暝。

Dīh hia 等 kah 過轉日早起 10 點外鐘，dngh dirh 西風 ziah koh 再出航，來到塭港溪口 ê 時，天已經暗。

koh 隔轉日 ê 27 日，范登堡 ê 船隊駛入塭港溪，發現龍骨會面 ê 水 syū 淺，無法度航行，等到彼下晡四點外，潮水漲 kûan，ziah 佫起行。范登堡長官命令所有士兵攏落船，拖舢舨仔，用步輦行沙洲頂面前進，大約行一浬路遠，dīh 28 日 ê 黃昏時仔，來到笨港溪口 ê 一座蔦松林，進入蔦松林內。照約定，beh dùah 蔦松林內等候尤鈕斯牧師 cūah 伊 ê 人來會合。

無偌久，大概 dīh 日頭猶未落海以前，dirh 看 dirh 尤鈕斯牧師 cūah 伊 ê 人來到樹林內。全軍會齊了後，準備明仔早起出發，向華武浪大庄前進。

10 月 29 日 透早，范登堡長官下達進攻命令：

第一隊：尤鈕斯牧師騎馬帶領遐咿 Formoan’a 戰士，步行做頭陣；隨後由 Jan.Juraese 隊長指揮 ê 部隊做先鋒部隊。

第二隊：是第一批戰鬥部隊，由 Peter 中尉指揮，隊內包括 5 隻載運火藥、火藥線參鉛矷 ê 馬，kah 十二個騎兵 kah 戰馬。

第三隊：也是戰鬥部隊，由 Walraven de Riviere 中尉指揮。

第四隊：是後衛部隊，由 Carele 中尉指揮。

另外，命令 Maerten 船長留 le 守 dùah 蔦榕林，dīh 樹林底安置四門大砲，調派四個砲手 hām 一隊士兵，hōh Maerten 船長指揮，固守 hiai 士兵拖來 ê 舢舨仔船，確保凱旋返來 ê 時，會 dàngh 順利倒返去大員。

安呢，全部隊伍安排好勢，等待日出了後 ziah 離開蔦榕林，取陸路，向華武浪大庄前進。大約彼下晡二、三點仔左右，來到華武浪溪 ê 堤岸頂。范登堡長官命令全軍 dùah hia 紮營，等候天光。

10 月 30 日早起，全軍佫起行，大約行一點外鐘，行一浬外路，dīh 10 點腳兜仔，來到有看見華武浪大庄 ê 所在。

此場戰爭 ê 原因，講是因為 10 月 18 日，有三個 dīh 塭港 le kā 荷蘭人燒蚵殼仔灰 ê 明國人 hōh 華武浪人攻擊；講華武浪人明其知影 ziai 明國人是公司 ê 工人，也敢 kā 尹攻擊，分明是 le kah 荷蘭人做對頭。

其實，這是表面的理由；塭港 ê 福星堅砲台 ê 地基 hōh 海水沖壞去，拄 le 修復，ia 佫大員也是一個沙島，為 dirh beh 加強海島城 ê 基地 hō 卡穩固咧，城 ê 周圍 kah 地面攏 le 鋪灰，二個工事同時 le 進行，需要大量 ê 蚵殼仔灰，早 dirh 知影華武浪 ê 海口仔港有一個窯地，生產 ê 蚵殼仔灰 多 (zē ) 佫 好，le 肖想 hia  ê 蚵殼仔灰，ziah 是真正理由。

佫有一個理由：頂月 19 日，南部 ê 枋山社發生動亂，有一個專替荷蘭人通風報信 ê 抓耙仔 Dākobóng hōh 社內 ê 人合力 kāh 伊殺死。范登堡長官認為枋山人 ê 所作所為是一種叛逆 ê 行為，講是荷蘭人大過仁慈，尹 ziah 敢安呢亂來；派一個下士 cūah 50 個士兵，去處理殺死 Dākobóng ê 兇手；同時決定 beh 出兵去攻打華武浪，來向所有的 Formosa’a 人展示一下仔荷蘭人的威風。

這是一場石頭 kah 鴨卵 ê 戰爭！？

荷蘭軍有火鎗 kah 大砲，有騎兵隊，佫有本島仔戰士 le kā 尹助陣；華武浪人 kānnā 有弓箭 kah 幾支仔鏢槍 niahnyā，未曾戰，輸贏 kahna 已經決定啊！

Mhkurh，荷蘭軍叨也不敢大意，dirh 叫 hiai 本島仔戰士做頭陣，ziah敢來進攻。可見荷蘭人也知影這華武浪大庄 mh 不比枋山社，無 hiani'ya 簡單！

根據荷蘭人時後 ê 檢討，講：華武浪人 ê 身高 kûan-大，佫是有名 ê 勇士，若 kānnā hiai 順民去 kah 華武浪人對 pah，惊仔會 hō 華武浪人拍 kah 落花流水。是華武浪人知影荷蘭軍 ê 利害，mh -敢 kah 荷蘭人對敵，佫有神 ê 庇佑，ziah 會 tàngh pah 贏這兇猛 ê 敵人。

當然，弓箭 beh-na pah 會贏火鎗 kah 大砲？

Mahkurh，嘛無的確 ne！Nā-beh 是華武浪人甮 (bong) 直接 kah 荷蘭兵對陣，kā 引到野外去，koh kāh-i 拖到日落暗暝，火鎗尋無目標，火線頭 ê 火光顛倒變成弓箭 ê 目標；又佫地形無熟，若對風頭 kāh 伊放一葩火，三百個荷蘭兵若 beh 平安倒返去海島城，除非天落紅雨。

華武浪人自尹日常 le 獵鹿仔 ê 經驗，當然嘛知影此款有利 ê 野外戰法，嘛一定想過用此款野外戰法來對付荷蘭軍。Mhkurh，華武浪人最後卻放棄這種有利 ê 戰法，直接 kah 荷蘭兵接陣，ziah 會 hō 荷蘭人得 dirh 全般 ê 勝利。荷蘭人講是尹 ê 神 le 庇佑，其實是華武浪 ê porra (和平) ê 神決定了此場戰爭 ê 輸贏。

〈繼續〉