無名火明王

無名火

無名火明王

車到嘉義已經過晝。倁九月天，秋日虎會咬人个日子，卜尋一搭卡涼个所在食中晝，「瑪唐那」是上介好个所在，場所大，有冷氣，佫有咖啡或是飲料挏好飲。

買一份四號餐，坐僀向壁个長桌仔前，壁頂是一面大鏡。我个後壁有一塊桌仔，坐一個查某人，照倁鏡內拄拄和我對面，坐倁我个面頭前。三十外，面肉黑黑，一身軀艴色个衫，穿一雙山搭喻舊舊漉束，安怎看都是醜个彼類；胸前掛一塊翡翠玉墜，翹腳硞硞趛，制致叻食个馬鈴薯簽。

一個親像安多尼昆个鐘樓怪人彼款个阿婆，倒手�一大包易開缶个空罐仔一可仔破字紙，用偆叻彼肢正手，出力拺開店門个大門扇，來到櫃台頭前。

此仂天年，連此仂阿婆都愛食此款「垃圾」啊！我安呢叻想。

阿婆參擔當个工讀生不知叻講啥乜？二個人恰若有啥乜代志叻歹解決。一個親像班長个人不知加工讀生講啥乜，彼個工讀生去捧一杯牛乳茶來互阿婆。

阿婆加彼杯牛乳囥双櫃台頂，手不知佫叻比啥乜？今仔連親像班長个彼個人都無法度解決个款。

原來阿婆不是來買物食个，是來叻抻長手个。我心內拄安呢叻想，看見鏡內彼個查某人已經踏大步去到櫃台前，對个褲袋仔內拕出一張紅色个百票，交互彼個工讀生，才佫踏大步倒返來原來叻坐个椅仔位。

嘛佫代志役是無解決，阿婆對彼個工讀生講：

「恁个麵包赫尔貴，我無愛買！你一百匝還我；一百匝我用叻十日咧。」　

最後，工讀生將彼一百匝交互阿婆，佫卜去椅仔迡坐，挏互坐叻飲彼杯牛乳茶。

「免啦！我僀外口跔一下着好。」

小心加一百匝囥入去衫仔袋內了後，阿婆拺開大門去踞双M字个大看板腳，侔双柱仔邊叻飲拄才工讀生捧互个彼杯牛乳茶。

店內回復平靜，人客照常各人叻食尹各人个「垃圾」、各人叻飲尹各人个 qola、咖啡，或是牛乳茶。

我看見鏡內彼個查某人一個面仔膨犀犀，兩旁目眉翹就天，咬牙切齒，二個拳頭母掟 pih-pih惴，規個人恰若互一葩無明火吞噬落去，目睭唅着泪洒，用力加紙杯搮搮破，加馬令薯簽捽爛爛爛；「唪」一聲，加个「垃圾」入去畚溲桶內，才踏大步行出大門，對踞倁看板腳个阿婆身邊閃過去，故意加頭殼穵一邊，盯做無看見。

不知是想着此個世間个無公平，役是為着彼個阿婆不食中晝，卻加个一百匝抸返去，叻大受氣？

GNP對拄即此個阿婆當然一點仔意義都攏無，無名火咁咧有啥乜仔路用？外面日虎炎戾戾，黕仔膠路燒滾滾，暑連我嘛弡弡卜受氣起來。

--------------------------------------------------------------------------------------------------------