玉-欖仁樹

秋姑仔魚

欖仁樹

烏龜澶

玉蘭花

欖仁樹葉仔紅个時

仁愛路有一條名人巷，巷內有一間茶藝館，是明山加此間茶藝館个名號做「阿玉茶藝館」个。

明山講：無啥乜特別个理由，是因為彼間店个查甫頭家个名呼做「阿玉」。

彼年新正，明山招松如逗陣去一間茶藝館飲茶。明山加松如講：伊收着一張茶藝館新開業个請貼；講叨不仈此間茶藝館，尹若會知挏寄帖仔來互伊？逨加看是啥乜人？

阿玉茶藝館是一間普通个踦家改裝个，店內隔着幾間仔茶房，一間總間，排幾塊仔茶座；窗仔外有一個園仔種朝鮮草，靠牆个所在有一欉欖仁樹。

阿玉看來三十未就，県県、二蕊目睭大大，算是媄媄萡姑娘。看着明山參松如來，笑嘻嘻，緊對櫃台出來。

「歡迎光臨！」

阿玉用真熟練个職業語言加尹招呼。

「啊！咁不是林先生？」

「呃！你哪會仈我？」

「你煞佅記得耶？有一擺，咱坐仝一幫飛機對日本返來；你有一張名片互我耶！」

「呵！我想起來啦，妳是李小姐乎？」

「着啊！」

「我叫而啥人咧，哪會知挏放貼仔互我？原來是妳。」

「初開張啦，加我逗捧場濟。」

「當然，當然。」

「曷嘸，咱來此旁坐。」

李小姐着是阿玉，明山尹二個入去頭前間个茶房迡坐，窗仔外拄對着彼欉欖仁樹。

「無閒無工，互你來加我逗捧場，佫朋友來……」

「佅啦、佅啦！此位是我个朋友黃松如先生。」

「黃先生乎！我是阿玉，初見面，即卡霎來坐咧。」

「當然。當然。」

「烏龍好呣？我逨捧茶，今仔日我請客！」

阿玉看起來真正誠意，捧來二杯烏龍茶，坐落去椅仔，佫一擺加明山道謝講：

「真正多謝恁來加我逗捧場。」

…

自安呢了後，明山着常常倁此間茶館叻行踏。講實在个，明山對飲茶此項並無若仔興趣。是半路交着一個朋友，希望會倲保持此個關係呤呤；互相講話會投機，參采仔才是真正个理由。

逐禮拜六，明山着會來阿玉茶館坐坐咧。若看着明山來，阿玉着恰若天跋落月，歡喜加明山个手叻不放。

「我拄想卜叫電話互你，你着來。」

「咁有啥乜代志？」

「欸呣，一些仔店內个代志想卜請教你。」

「講啥乜請教，茶館个代志我若會曉？」

「我講互你聽啦……」

「生理孬是呣？」

對明山來講，茶藝館个代志確實真生疏、嘛真新鮮。本來伊想嗊：若有人規日閒閒倁遐叻飲啥茶？

「不是啦，生理嗨嗨仔啦，是店名个代志想卜拜託你…」

「哦！」

「妧朋友攏嫌我此个店名觴臭蔟。」

「店是你个，你家己若好着好嘛……」

「叨是安呢呣，當初信采號一個名，我家己嘛無足甲意。」

「烏龍茶藝館哦……？」

「欸呣，尹攏叫我烏龍院茶藝館！」

「哈哈哈……，曷無咧，呣着改名？」

「我叨叻想呣，你加我逗想濟。」

「拄才開業呤呤，着卜佫改名乎？」

「卜三個月啦，無要緊啦！」

「嗯……，號做「阿玉茶藝館」好呣？用你个名？」

「安呢咁好？」

「好啊！阿玉此個名真親切啊！」

自安呢決定，加「烏龍茶藝館」改名叫做做「阿玉茶藝館」。

…

茶水生理總靠一個泱頭呤呤，不比一般生理會用得隶隶仔來。緊叫人來換新个看板，阿玉佫印一套帖仔，準備佫重開業一擺。

阿玉講：

　　「其實，茶館叨攏無趁錢，到呾拄仔拍直呤呤。改一個仔名，希望有一個好頭采。」

今仔店名是伊夅號个咯！生理若無卡好起來，明山煞感覺恰若有一個仔責任。拄安呢叻想，好佳哉，阿玉茶藝館个生理一日一日好起來。一可仔無固定工作時間个人常常來遐消遣；親像某某電視演員啦、女歌星潘某啦，也時常倁遐叻行踏；近來講是某歌星辦公廳个嘩咿噢仔嘛四常來遐叻咿咿噢噢。看來「阿玉茶館」真正是一個好頭采。

…

旧年个仝此個時，阿玉對明山安呢講：

「此月日个十五，是咱阿玉茶藝館開業一週年記念日，一年來，攏互你叻逗幫忙，真多謝啦！我想卜送一個仔禮物互你。」

「免啦。」

「佅要緊啦，一個仔意思呤呤，領帶？役是T 卹？你愛佗一項？」

「妳想卜用領帶加我縛叻牽猪是呣？卜送你着送 T 卹。」

「安呢好啦，你穿幾號个？」

「M个着會使得，短手袂个哦！我卡省佫改，嘛卡俗。」

「Ok！愛啥乜色？」

「參你講笑个啦，免啦。」

…

近來明山个公司卡無閒，卡無時間挏去阿玉茶藝館行踏，大約一個月仔才有一擺機會挏參阿玉開講，名人巷恰若愈來愈遠。講卜送T 卹个代志嘛自安呢煞煞去。

阿玉生做烏烏，無算真媄。嘛佫氣質好，鼻頭淩凌凌，親像勝利女神个面，互人好印象。少年着是媄，對明山來講，三十未就个阿玉是一個夢想中个好對象。明山嘛將近四十个人，羅漢腳仔生活無尾梢，嘛應該着尋一個仔巢个時噂。嘛佫，性情活潑个阿玉，每日倁遐伊茶客雅士中間叻應酬，日子久啦，難免發生一可仔閒仔話。有人講：最近阿玉時常收店後，參一位企業界个頭家出現倁中山北路一帶个酒廊。

「喂！做生理嘛，應酬應酬是可以，你不挏……」

對明山个此款忠告，阿玉啥乜都攏無講，干吶頭傫傫，心內底感覺明山有一些仔怪怪。

佫無若久，明山發覺阿玉無倁店迡叻顧店，問其他个店員，干吶講頭家叻破病，其他个代志攏講不知影。

佫大約半年了後，明山看見阿玉又佫出來倁店迡，目睭窳窳，人嘛卡瘦，恰若拄病才好彼款感覺。

佫有一擺，明山倁忠孝東路个SOGO百貨公司迡着阿玉抱一個嬰仔。

「這我个嬰仔ne，你看，有承我否？」

阿玉加明山安呢講。

明山有一些仔受騙个感覺。雖然伊參阿玉役無啥乜深沉个感情，心內猶原佅平靜。

了後，阿玉又佫回復活潑，佫親像咏日仔安呢叻經營个阿玉茶藝館；人變比以前佫卡妖嬌、佫卡有查某味。

好景不常，時機變遷，茶藝館个生理漸漸歹做，一可仔關門大吉，一可仔走入地下經營色情。名人巷个茶藝館自安呢沒落落去，明山着罕得佫去名人巷啦。

…

頂日聽松如講：阿玉茶藝館變真荒廢：

「幾個仔不三不四个人倁遐叻大細聲，叻講輸若多啦！大家樂差一字啦…。」

「粉味个是呣？」

「粉味个是無啦，阿玉拍算嘛維持佅久啦！」

「嚄……」

「阿玉真無采！」

「呣……」

一個月後，阿玉抱尹嬰仔來尋明山，講伊參尹嬰仔个爸爸扯啦，尹嬰仔个爸爸互伊一札錢，計畫卜參朋友開一間咖啡廳，拜託明山佫加伊號一個名。

明山細仔聲講：

「加…，號做阿玉咖啡廳嘛！」

幾日後，名人巷內最後一間茶藝館關店啦。又佫是園仔內彼欉欖仁樹葉仔紅个時；焦葉仔沰規土尻迡，哀愁嘛沰規土尻迡！

--------------------------------------------------------------------------------------------------------

TOP