玉-台灣閣

台灣閣

十一月尾 dī 東京已經是冬天，早起時仔冷風 sgh 入骨，uìh 腹肚底 kwâ 出來。街仔路邊，枯黃 ê 銀杏葉仔颺颺飛，來往 ê 人攏 kā 頭殼 kiu入去頷仔內，留二個鼻孔親像火煙船 le 吐霧，空氣 kahna hōh 霜凍 ken 去，四過恬 zih-zih。

Kab 淑雲約 dùah 新宿車頭見面，beh lai 御苑看台灣閣。

淑雲 dùah dīh 北 KAMAKURA，dirh 坐東海道線 ê 電車來到東京，佫拌 YAMATE 線 ia 中央線 ê 電車 ziah ēh-dàngh 到新宿，安呢來，大概 dirh 愛一點外鐘。Zad 好時間，我 ziah 對十条銀座出發，坐AKABANE 線電車到 IKEBUKURO 拌 YAMATE 線去新宿。我 dùa ê 所在離驛頭十外分鐘路途，扒一個崎，cwâh 過環七大路，佫行一暫仔商店街 ziah 會到車頭。商店街 ni 有一間咖啡館，已經有人 le 坐，咖啡芳貢貢，uìh 玻璃門縫流出來。

到新宿，淑雲已經 dīh hia le 等，穿一 sū 蘇格蘭毛哖仔 ê 角格仔洋裝，匒一領蔻白色 ê 風衣，半年無看 dirh，比以前卡消瘦，pahsg 有啥乜代志 hōh 伊 le 操煩，一絲仔憂傷浮 dī 伊 he 清秀 ê 面容。行出車頭，順一條小街仔直直去，沿路 na 講尹候生，嘛講 Gun 查某 kyá，已經來到御苑 ê 門口，二個守衛仔踦雙旁 dīh hia le 顧門。

御苑講是明治神宮 ê 外苑，uìh 新宿 tàngh 到 YOYOGI。對新宿入口此旁入去，是一大遍櫻花樹林，櫻花葉仔 hōh 秋風掃落地，偆一可仔枝仔棲仔不 niuhsyuh，kā 天 le 弄牙。行過櫻花樹林，佫去是植物園；植物園過去是一 dah 真闊 ê 草埔，咏時仔青凌凌，zim’ma 嘛 dālen 落去。草埔仔中央有一欉千年 ê 大楠仔樹，樹匝幾若人攬，直硠聳，靜靜 cāih dīh hia。

台灣閣講是 dīh 草埔 ê 西旁角，通過彎彎曲曲 ê 小路仔，遠遠 dirh 看見 qàmh 箔仔瓦 ê 厝頂；紅磚仔色、是故鄉 ê 紅柿 ê 色。

台灣閣 qíi dīh 磚仔砛頂，砛仔楚噢 4~5 尺 kuân，頂面鋪大甓磚，厝身用紅磚仔qōngh 下裙，白灰抹壁塹，角格仔門窗，挑屐頭彫二 qā 花藍，吊 dī 半天無拑扱，一磚一瓦攏嘛是對故鄉提來 ê。砛仔腳有一個池仔，埕仔內幾欉仔楊柳頭 lêh-lê，池仔內 ê 蓮花 būeh 堪得異鄉 kwâ，kiu 入於爛土內，籬笆仔邊插一塊細細塊牌仔，頂面寫 dirh「台灣閣」三字，講是台灣人感謝尹 ê 德政，qíi 送 hōh 日本皇帝。

台灣閣啊，台灣閣！你承受台灣人 ê 恥辱，diàmh le 他鄉異國，靜靜看 dirh 明治死去，看昭和死去，你咁知影蔣介石嘛死去啊！攏死去啊！

茫霧 kā 淑雲 ê 頭鬃目眉染白去。咱 lai 返！cūah 咱 ê 台灣閣返 lài 去，返 lai 去咱 ê 故鄉，咱故鄉 ê 紅柿 zim’ma 朱朱紅。

( 1993 冬天 dīh 東京十条 )

--------------------------------------------------------------------------------------------------------

TOP