玉-茄冬

茄苳

杜蘭山

去淡水

胭脂城

茄苳

倁兜个埕仔內，本來有一欉桑仔，不知有幾年久呵，萿一丈外県，春天若來着開新葉，着有人來偷挽，有囝仔，也有大人，有時嘛有親像媽媽个查某人，知影尹攏卜挽返去飼蠶，所以有看見盯做無看見，橫直葉仔挽去役會佫再發出來，這是桑仔唯一役會記得貢獻互人个天性嘛。𧪄

若到秋天，滿枝个桑葚紅記記，引來一陣鳥仔加予啄滿土尻，鳥仔屎糊滿樹枝。

桑欉个樹相無媄，嘛佫伊有光榮个歷史，自石器時代以來着佮咱人做伙，互人叻利用。嘛佫時代無仝啊，今仔已經十臧取無一臧，干吶此欉桑仔不知時恬恬萿倁兜个牆仔角，無去管伊，煞萿即尔大欉。

𣳈

旧年，此欉桑仔互一陣風颱掃倒落去。和淑蓉二個人勉強加伊敞起來，不知是老頭啦？或是失照顧，煞枯痑死去。

加死欉頭掘掉了後，彼個所在變成一個空窟仔，拄對着冊房个窗仔口，安呢煞參牆仔外个過路人無遮無袽，觴過淺現，所以決定卜倁彼個所在佫加以栽一欉樹仔。

淑蓉建議栽一欉紫荊，查某孖講櫻花卡媄。我講紫荊欉看起來頭重尾輕，無啥好看，佫干吶「紫荊」此個名字着真少人仈；草山以外，台北市內罕得看着櫻花叻開，櫻花若佅開花着恰若一欉榕仔仝般樣。

我建議來栽一欉茄苳嘛卡好。第一，茄苳个骨塊媄；第二是百分之百个本土樹木，一四過有坻看，逐人仈。候生贊成我个意見，自安呢決定卜加以種一欉茄苳。

彼日，我叫電話去互振春，加伊講卜加伊買一欉茄苳栽仔。振春倁內湖叻開一間樹仔園。振春講：

「你來看覓咧嘛！咁一定着愛茄苳？」

趁禮拜日有閒，我去振春个樹仔園。振春問我安怎若會選茄苳？除了頂面講个理由以外，我講：

「台北有真多路樹攏種茄苳，不啻干吶樹形媄，葉形葉勢嘛攏真媄，我愛伊一年四季青青青，不惊泂，不惊暑，不惊風吹雨打，攏佅落葉。」

「………所以叫做重陽樹。」

「我無愛此款名！」

振春轉一個話頭問我：

「你卜栽僀埕仔內是呣？」

「是啊！」

「安呢，你不挏栽茄苳。」

「為啥乜？」

「茄苳此仂樹仔無適合栽僀埕仔內。」

振春安呢講：

「你所看着个攏是街仔路樹，街仔路邊車煙多，空氣愈孬个所在茄苳萿叻愈好。」

「安呢有矛盾…………」

「佅、佅，空氣那孬，虫仔踮佅稠，才有挏萿遐尔仔青翠。」

「咁安呢？」

「茄苳爻生虫仔嘛！若加種僀埕仔內，三日五日着愛濺一擺藥仔，若無葉仔會互虫仔咋咋去。」

「咁有影安呢？」

「着啊！這是此行業个專業智識嘛。」

「……………」

「種一欉黑枋好呣！」

「啥乜黑枋？咁不是蘇枋？」

「仝款啦，人都攏加叫做黑枋。」

「一枝骨直硠聳，奚不好啦！」

「曷無，黃葉榕嘛真媄啊！」

「哦，我上討厭彼款樹仔。」

「安怎講？」

「安呢啦，頻哪榕仔都攏嘛是青色个，安怎伊哪會變黃个？」

「這我嘛不知影，大概是加青色个基因抽掉，互予浮出卡多个黃色基因。」

「總講互人改造个叨着啦！」

「是啊！」

「親像人夆洗腦去个嘛！」

「樹仔也不是人，卜安怎洗腦……？」

「仝款啊！對榕仔來講，黃葉榕已經不是榕，是一種異形。」

「………………」

振春恰若親像無啥了解我个意思。

「我上討厭此款變種个！」

想佅到，卜種一欉樹仔也有即尔費氣个代志，和振春拌嘴錦，拌一下晡，飲了三壺茶，代志役是無解決。振春提供个我攏無愛；我所愛个振春卻無贊成。最後，

振春講：

「樟仔嘛好啊！你返去想想咧，若決定才叫電話互我。」

自安呢，種樹仔个代志罣倁心頭，不是我不相信振春个話，對園藝來講，振春當然比我卡專業，嘛佫倁我个記池內面恰若不是安呢。

細漢个時，庄內个國民學校个校埕內有一排茄苳，倁庄尾个大水堀邊嘛有幾若叢大欉茄苳樹。古早時，倁咱此塊島，茄苳、蔦榕恰若萿滿滿是，所以「茄苳」、「茄苳腳」、「頂茄苳」、「上茄苳」此款个地名一五路有。亦有「茄苳入石柳」是本地有名傢俬。

茄苳此仂樹木和咱活過幾百年、幾千年、甚至幾萬年。倁空氣新鮮个古早時代，尹叨無去互虫仔咋去；是古早時代無咋茄苳葉个虫？役是古早个虫仔佅咋茄苳？役是今仔个茄苳變種啦，家己拴一身軀葉仔甜甜，甘愿互虫仔來加予咋去食？

根據兜溫个進化論，所有个動植物攏為着保護自己來叻演變，競爭之下決定優勝劣敗。振春个經驗顯然有矛盾，我个第三種假設嘛恰若也無啥合邏輯。𣳈

記得行政院个牆腳，倁忠孝東路佮中山北路个轉角，有幾若欉大茄苳，托連先生个福，規年迵天青青青；對面監察院个面頭前嘛有二欉老茄苳，冬天時幾蕊葉仔若枯痑去，樹枝着生耑龜蠅，倁遐卜死不死叻等春天；天母東路有二排茄苳，屬於新世代，萿青青翠翠；倁和平東路師範大學對面个人行道內面嘛有一排茄苳，仝款是新世代，卻可憐兮滿枝黑蝝，活不如死。

一樣天無仝樣月，仝一款茄苳嘛有尹各欉个造化，仝款栽倁路邊个叨有好有孬，仝款種倁宅仔內个嘛一定有孬有好。我決定卜種一欉茄苳試看覓咧，無卜佫再考慮振春个專業意見。

振春叫尹候生阿章載茄苳栽仔來，講是尹阿爸特別加我選个，加茄苳種好勢了後，卜返去个時，再三交帶講：等樹仔若活好勢了後，着卡霎噴藥仔咧。𣳈

這啊、奚啊，一厝內人加予沃水照顧，成個月後，此欉茄苳活好勢起來，有一人出頭県，茄萣色个樹骨有手股頭仔大，一撮葉仔油噹噹，穩穩倳倁牆仔角；親像一個十五歲少年家，健康、紐掠佫俏抖。一家人攏對此欉茄苳有甲意，連厝邊个李太太嘛謳咾講此欉茄苳真媄。𣳈

真緊三個月過去啦，一噂雨後，茄苳發新櫱出來；佫無幾日，看見幾隻尾蝶仔飛入來牆仔內，倁茄苳腳四過曳來曳去；佫無若久，看見一群青鴙仔倁葉腳叻坋來屳去，兜埕仔宛然是伊甸園。

𣳈

清明過後，淑蓉叫我着去叫振春來濺藥仔。淑蓉講：茄苳聲實着虫啊！我去看詳細，真正有影，一可仔公分大、綠色个小蚜虫仔倁叻咋食幼嫩个茄苳葉仔。𣳈

考慮健康个關係，會倲免濺藥仔盡量免，我決定用直接个方法來對付茲伊蚜虫。和寂蓉二個人足足用一晡時間，才加所有蚜虫仔通通除掉。𣳈

嘛佫，隔日一下看，又佫是規欉滿滿是，蚜虫仔親象對天頂沰落來，或是對土迡坋出來，比昨日佫卡多。𣳈

二三工來，掠啊、捩啊，愈掠愈多，愈捩愈多，多規樹頂岌岌趖。四五日後，有个牽絲吊叻葉下盪盪，有个開始加葉仔捲叻結繭仔做颮仔；又佫四五日後，規欉葉仔攏捲漣落去。安呢來，祇有叫振春來濺藥仔呤呤。𣳈

振春講：宅仔內佅使日噴卡強个藥仔，伊講：若到此仂地步，其實無啥乜法度。

振春每隔一禮拜着來噴一擺藥仔，總算加蚜虫除掉啊，嘛佫茄苳嘛烏撓落去。本來茄萣色个樹骨嘛湫白坲，一撮葉仔虯虯虯，恰若鳥仔巢。𣳈

梅雨過後，葉仔沰去一大半，無沰去个開始浮出一重烏蝝。烏蝝是植物个癆病，若湠滿規葉迡，着互樹葉仔無法度呼吸，嘛會加日光遮叻，互葉仔失去光合作用。我用水來加伊洗，着是洗也洗不盡，扢也扢佅了。

安呢經過二冬啦，此欉茄苳今仔親像師大對面彼搭个茄苳，可憐兮滿枝黑蝝，活卡慘死。

振春講个話恰若無不着，茄苳無適合種僀埕仔內，連離車路卡遠个所在都佅用得，因為茄苳變種啦！今仔个茄苳着愛種僀有車煙、空氣卡孬个所在，才佅去互虫仔加咋去。𣳈

頂日有一台發財仔車倁牆仔外叻叫賣「茄苳雞」，以前有「刺桐雞」，倁時仔變做「茄苳雞」？拍算茄苳葉仔聲實變甜娓啦，佫五十年後，菜市仔叵定有叻賣「茄苳菜」。

士林法院个東旁邊，有一排班芝樹，樹枝愣長佫橝橝，硬攙無去，樹骨个刺剟變兀去，此仂天年，茄苳不成茄苳、斑芝嘛不成斑芝。

頂日去淡水，順路去北新庄尋東南阿飲一杯茶。東南尹兜面前有一個曠地仔，本來有一欉大欉茄苳，樹匝有三四人攬，今仔無看見啦！東南講：樹萿倁別人个地，尹卜加掘起來，咱嘛無法度，實在真無采！

老茄苳夆掘撣拺去啦，新个茄苳無適合栽僀埕仔內。若不甘加茄苳栽僀路邊叻互嗆車煙，祇好加伊種僀心肝內！

--------------------------------------------------------------------------------------------------------

TOP