台語文學評論-台語文學e高度

。

台語文學 êh 高度

師大台語所主任李勤岸教授有一篇台語文〈台語 e5 高度〉刊載 dīh《島鄉台語文學》第 28 號。Zid 篇台語文寫了真好，會 dàng 寫 ziahnii 好 ê 台語文 êh 人無幾個。Mhkurh，其實這嘛是應該 e，因為伊是台語所主任李勤岸教授啊！先來 kāh 欣賞 zè：

哈佛大學台語筆記

台語文學 e5 高度

李勤岸

。

Tu2 koh 有一隻飛行機摔落來，ti7 New York e5 皇后區，teh 著四間厝，機頂 kap 厝內 e5 人無半個存活。

電視有二個 bang3-gah。一個是曲線圖，問講：『你對飛行安全 e5 信任按怎？』，頭前是有起有落 e5 股票行情，忽然間變做一條直線，一直摔落去，衝出曲線圖 e5 外口。另外彼個圖，畫一隻鷹鳥，問伊講『你敢 beh koh 飛？』伊嘛是 tim3 頭講 yes。

Ti7 西海岸三藩市 e5 柏克萊大學第二代台美人 e5 台灣同學會，邀請我 ti7 這個禮拜五去演講，講 in 足興奮 teh 期待 kap 我見面，寫 email koh kha3 電話來確認我是 m7 是有改變心意。我講，我是隻鷹鳥。

透早 ui3 波士頓飛去休士頓轉機。

有朋友 bat 講台灣二千公尺以上 e5 山有二三十粒，但是台灣文學真少寫到 chiah nih8 高，台灣文學 e5 高度一直攏停留 ti7 西部平原 e5 高度。

我飛 ti7 4萬 5 千英呎，靠 ti7 窗仔邊寫作，m7 知有法度提升台語文學 e5 高度無？

大湖區過去，出現濟濟細細、碎碎 e5 小湖，kan-na7 kong3 破大鏡，碎片 ia7 kah 滿四界。

矮矮 e5 山，柔柔 e5 山崙，薄薄 e5 雲，輕輕蓋 ti7 頂高。Khah 遠 e5 所在，山勢 khah 高，一層一層高起去，翠藍 e5 色緻。雲嘛是輕輕薄薄 e5 紗蓋。

一陣厚雲飛入來飛機下腳。M7 是講完全密密密，是有一寡雲縫，有點仔神秘感，ui3 雲縫看入去，彎彎曲曲 e5 河流，親像一隻大蟒蛇，神秘 e5 蛇，有真強真刺目 e5 反射光，sih 一下 to7 過去 à。

坐 le 窗仔邊，叫一杯咖啡，be7 輸坐 ti7 咖啡廳 teh 欣賞窗仔外 e5 光景，只是這個咖啡廳浮 ti7 4 萬幾英呎 e5 空中，隨時有可能摔落去。

實在愛靠運氣，若是坐 ti7 翅仔邊，ho 翅仔遮遮 leh，抑是天氣無好，雲傷厚，嘛是看無…。這回坐 ti7 翅仔邊，只好 ka7 頷仔管斡向後壁，倒反看。…天氣無好，雲真厚，遮遮 leh。

雲若厚 kah 這號形 e5，敢猶會使叫做雲？已經參雪堆一模一樣，白 siak-siak，圓滾滾，一堆一堆。有 e5 邊仔開始溶去，變做烏臭烏臭，thai2-ko thai2-ko。雲 chiah-nih8 厚，kai3-seng5 會當hou7 囝仔 ti7 頂高 noa3 來 noa3 去，飛行機若摔落去，應當會浮 ti7 雲雪頂面才著。

忽然間，看著一個全圓 e5 虹，ti7 一蕊雲邊，水氣 hou7 日頭光 ho ti7 某一個角度照出來，完整e5 圓虹，瞬間 to7 化無去啊。Ti7 Hawaii，ti7 這個彩虹州 toa3 規十冬久，不時會看著虹，足大足大 e5 虹，大 kah 鏡頭入 be7 落去。M7-koh 攏 kan-na7 是足大 e7 半圓，另外彼半是 m7 是 ti7地球 e7 另外彼個半球？

出來雲堆，隨看著一片岩石山--落磯山脈。頂高有一寡碎點碎點，那像是 ti7 頂高參寡芝麻，有可能是一寡樹仔。足大片 e5 山脈，山谷地形。磷磷峋峋，足 seng5 恐龍 e5 腳踏出來 e5 腳印，爪痕斑斑。其實規個地形嘛足 seng5 一隻一隻形款不一 e5 恐龍。是 m7 是恐龍絕跡以後自按呢化做洛磯山脈這個特殊景觀。

科羅拉多河貫穿整個山脈，切割成大峽谷，形成世界十大奇景之一。Ui3 4 萬 5 千英呎高看落去，大峽谷更加壯觀。我有看著一個大平臺，liau5 仔有成台灣島 e5 形。聽講大峽谷本身就有台灣 e7 10 倍大，莫怪飛行機飛規點鐘猶飛 be7 出去。去大峽谷觀光，若是坐小飛行機 ti7 頂高旋，愛開真濟錢，這回我坐這台 Boing 737 c hiah 大台，實在有值票價。有 e5 山頂開始 le 積雪，山頭白雪雪。看著規畫整齊，一格一格 e5 平原，蜘蛛網形 e5 人口聚落區，應該著是加州啊。有一個湖，水真青翠，真冷 e5 感覺。彼 e5 湖，ti7 半山坡，水真滿，強 beh 溢出來。無張持感覺伊真正會溢出來，因為伊愈來愈 khi，原來飛行機 teh khi 身，轉彎，beh 到舊金山啊。

慢慢降落。一個大海彎出現，水色是濁濁 e5 土色，有幼幼長長 e5 橋通過。機身強 beh ko7 著水面啊，佳哉機場 e5 跑道出現，安全降落。 (完)

講 zid 此篇台語文「寫了真好」；是 le 講：就「話 êh 角度」( 讀起來順口，符合台語 êh 語感 kah 語法習慣，透過朗讀，一般人攏聽會 bad 其中每一句話，ēh-dàngh 了解其中連貫 êh 意義 êh 角度) 來講 êh；不是 le 講：文 êh 內容 kah 結構。若 beh 討論文 êh 內容 kah 結構，我 kahkī 三兩 ng’nga (笎仔) 先除除咧，不敢關老爺面前 le 弄大刀。

「台語文」是記寫台語 êh 文，佗位到佗位是台語，佗位到佗位是不是台語，對接受過完整中文教育 êh 人，加上漢字 êh 表意功能，常常無法度界限清楚，陷入陳培豐《由敘事、對話的文體分裂現象來觀察鄉土文學：翻譯、文體與近代文學的自主性》所講 êh，dih一篇文章中間使用雙語 êh 情形。親像：尾起第 3 段 êh「…山谷地形。磷磷峋峋，足 seng5 恐龍 e5 腳踏出來 e5 腳印，爪痕斑斑」、尾起第 2 段 êh「實在有值票價」kah 上尾仔段 êh「機身強 beh ko7 著水面啊」cāh「有幼幼長長 e5 橋通過」。

不過若 maih 食猪肝 cńng 骨， ia 是一篇 ēh 用得欣賞 êh 台語文。

下面是我用「台語文學 e5 高度」做底試寫 êh：

。

台語文學 êh 高度

拄佫有一隻飛行機 siak 落來，dīh New York êh 皇后區，deh dirh 四間厝，機頂 kap 厝內 êh 人無一個有命。

電視頂面出現二個 banggah。一個是一張曲線圖，頭前是有起有落 êh 股票行情，忽然間變做一條直線，一直 siak 落去，衝出曲線圖 êh 外口，問講：『你對飛行安全 ê 信任按怎？』另外一張，畫一隻鷹仔，問伊講『你敢 beh koh 飛？』鷹仔 tím 頭講 yes。

Dīh 西海岸三藩市 êh 柏克萊大學第二代台美人 êh 台灣同學會，邀請我 dīh 這個拜五去演講，講尹足興奮 le 期待 beh kab 我見面，寫 email 佫叩電話來確定看我咁有改變心意？我講，我嘛是一隻鷹仔。

有朋友 bad 講台灣二千公尺以上 êh 山有二三十岦，mh 佫台灣文學真少寫到 chiahnii 高，台灣文學 ê 高度一直攏停 dī 西部平原 êh 高度。

我飛 dī 4 萬 5 千英呎高，偎 dīh 窗仔邊 le 寫作，知有法度提升台語文學 êh 高度無(bùr)？

過了大湖區，出現真多細細、碎碎 ê 小湖，kahna 摃破大鏡，碎片 iāh kah 滿四界。

山矮矮，山崙仔岷岷，雲薄薄，輕輕仔嵌 dīh 頂高。卡遠 êh 所在，山勢有卡高，一坅(gám)一坅高 qid-lì，歸遍翠藍色，嘛是 hōh 輕輕薄薄 êh 雲，kahna 紗仔巾 kā-i 嵌咧。

一 bok 厚厚 êh 雲飛入來飛機下腳。不是彼 lūr 密密密 êh，是有一寡仔雲縫 êh 雲，有一 sud’la 神秘 êh 感覺。Uìh 雲縫看落去，一條彎彎曲曲 êh河流，親像一尾神秘 êh 大蟒蛇，有真強真刺目 êh反射光，爍一下 dirh過去啦。

坐 duàh 窗仔邊，叫一杯仔咖啡，bē 輸坐 dīh 咖啡廳 le 欣賞窗仔外 êh 光景，kānnā zim’ma 此間咖啡廳是浮 dīh 四萬幾英呎 kûan êh 半空中，隨時都有可能會 siak 落去。

若 beh ēh dàngh 安呢嘛愛靠運氣，若坐 dīh 翅仔邊，hōh 翅仔遮 le，ia 是天氣無好，雲 nsyû厚，嘛是看 bēh dirh 半項…。Zid 擺坐 dùah 翅仔邊，煞 dirh kāh 頷仔頸越向後壁，倒反看。…天氣無好，雲真厚，hōh 雲遮遮 le。

雲厚 kah zid lūr 形 ê，咁猶會使叫做雲？已經參雪堆一模一樣，白 siak-siak，圓滾滾，一 bok 一 bok，有 ê 邊仔開始 le 溶去，變做烏臭烏臭，taikūr-taikur。Ziahnii 厚 êh 雲 káih-sêng 會dàng hōh 囝仔 dùah 頂高 nùah 來 nùah 去，飛行機若 siak 落去，應該嘛會浮 le 雲雪頂 ziah dirf。

突然間，看見一雱 (phâng) 全圓 éh 虹，出 dīh 一 bok 雲邊。水氣 hōh 對某一個角度照來 êh 日頭光照 dirh，出一個圓圓圓完整 êh 虹，目一個焛 (nih) dirh 消失去。Dih Hawaii zid 個彩虹州 dùah 規十冬久，不時都看 dirh 虹，足大足大 êh 虹，大 kah 入 buēh 落去鏡頭 ni。Mhkurh 攏 kānnā 是大 ā 大 êh 半圓 niahnyā，另外 hid 半咁是出 dīh 地球 êh 另外 hid 旁半球 ni？

對雲堆出來，隨看 dirh 一遍岩石山--落磯山脈，頂 kûan 有一寡碎點碎點，na 像是 dīh 頂面 sáam 寡麻仔籽 êh，拍算是一寡仔樹仔 êh 款。山脈足大遍，山崿坎坎砐砐 (qàm-qàm-qed-ket)，足 sîng 恐龍 êh 腳踏 dirh êh 腳跡，腳爪痕一 cok 一 cok。其實規個地形嘛足 sîng 一隻一隻無仝形 êh 恐龍。咁是恐龍絕種了後，化做洛磯山脈 zid 個特殊 êh 景觀？

科羅拉多河 ncwâh 過規個山脈，kāh-i 切割 nzyâh 做大峽谷，形成世界十大奇景之一。Uìh 4萬 5 千英呎 kûan 看落去，大峽谷愈佫卡壯觀。我有看 dirh 一個大平臺，lirfh 仔有 sîng 台灣島 êh 形。聽-i 講大峽谷本身 dirh 有台灣 ê 規10倍大，莫怪飛行機 vūe 規點鐘 ia vūe bē 出去。去大峽谷觀光 êh 人，若坐小飛行機 dùah 頂高 sef，dirh 愛 qāi 真多錢，zid 回我坐 zid 台 Boing 737 ziah-ni 大台，實在有夠本啊。有跡(liah) 山頂開始 le 積雪，山頭白雪雪。看dirh 規畫整齊，一格一格 êh 平原，kah kahna 蜘蛛網 êh 人口聚落區，應該 dirh 是加州啊。山腰有一個湖，水真青翠，滿 kah giôngh beh 溢出來，kahna 真冷 êh 款。無意間感覺湖水真正 lib beh 溢出來，因為湖面愈來愈 qi，原來飛行機 le qī 身，轉彎，立 beh 到舊金山啊。