台語文學評論-台語文mhtang無枷giah門扇板

。

台語文 mhtāng 無枷 gîah 門扇板

。

頂日接 dirh 一位朋友寄來 hō 我伊新著作出版 ê 冊，內容是討論台語適用漢字 ê 問題。作者 kahkī 講伊是一個痴迷白話字，深深知影台語漢字 dīh 台語文章內 ê 使用，iau 有真多未決 ê 爭議 kah 困難。雖然安呢講，伊 zid 本冊 ê 內容佫是千遍一律 lg 入去漢字 ê 叢林中 le 討論台語漢字 ê 正字，希望建立「音義貫通」ê 台語文。免講你嘛想 ê 到，若照 20 外年來 ê 經驗，伊 ê 熱心一定會佫引起別人 ê 疑問 kah 反彈，製造佫卡多 ê 爭議 kah 爭吵，許成章 anni，陳冠學嘛是 anni；吳守禮 anni，吳坤明嘛是 anni niahnyā。

舊年我 ê 另外一位朋友嘛出版一本討論台語漢字正誤問題 ê 冊。我 zid 位朋友一直堅持講台語文 dirh 愛採用全漢字文，反對我 le 講 ê 漢羅文體，講我 dirh 愛先 kāh 我編寫出版 ê「台語四用漢字字源」燒毀 dànhsak，ziah 會用得主張漢羅文體。「家己 ê 母語 dūr le hông 壓迫 ê 人，kek 抱 dirh 壓迫者 ê 語文字 le 阿嬰阿孥，權算也是世間無奇不有之一。

詳細觀察 ziai 堅持台語文一定 dirh 愛採用全漢字文體，kahna 若無漢字 dirh 無台語 ê 人，大約會用得分做三種人；頭一種是學院 ê 音韻學者，根據曾進民〈臺灣地區漢語方言音韻論著選介〉，kānnā 1999-2003 年 dirh 有 241 篇論文，發表 ê 專書有 41 本，合計發表人數 129 人。若佫加上 2004 以後到現在，又佫 libbeh 八年 a，「漢語方言音韻論著」已經不知有若多啊。

所謂「漢語方言音韻論著」是先設定一個「標準漢語」，假定各地方言攏是對這「標準漢語」所衍化出來 ê ，ziah 佫按照所謂「音韻變化」原則，來尋出方言 ê 源頭正字。這個方法 dirh 愛先有二個相對 ê 條件，dirh 是「標準漢語」ê 存在， kah 所 beh 比對 ê「語言」屬於漢語 ê 一種方言。若「標準漢語」根本 dirh 無存在，ia 是所 beh 比對 ê「語言」根本 dirh 不是漢語 ê 一種方言 ê 時，論証 dirh būeh 成立。對台語來講，台語 kah 漢語中間，連「anzwág (安怎)」、「mh zāiyáⁿ (不知影)」都無法度相通，惊仔連論証 ê 基礎都無。

Pahsg 嘛是因為 anni，雖然有 hiahnii 多 ê「音韻論著」，嘛 dirh 等到 1997 年 ziah 有台大教授楊秀芳提出「台語建議用字 300 字」；2010 年教育部國推會提出「台語建議用字 700 字」niahnyā。國推會 ê「700 字」又佫是根據楊秀芳 ê「300 字」所增加 ê，實際上 ziah ke 400 字 niahnyā，中間經過 12 年。根據統計，寫台語 (全漢字文) 大約 dirh 愛 7、8000 字，若準其中 ê 一半發生爭議 dirh 愛研究制定「建議用字」，照這進度計算，dirh 愛 120 年；ia 佫 dirh 有人、有公權力，到時嘛已經「鹹到 kê 臭」，台語早 dirh「安樂死」啦。

第二種人是一 kua’a 愛惜台語 ê 民間人士，kahna 超級教練，kahkī 無 beh 拍球，連 batto (bat) 都 mh bad bong dirh，kek kānnā 會曉嫌別人拍球拍無好。Dīh 國推會「台語建議用字700 字」ê 聽証會 ni，有人大罵「後壁」叨無「壁」，哪會用得寫做「後壁」？有人講 dirh 愛寫做「後面」啦，煞 būeh 記得「後面」嘛是無「面」，哪會用得寫做「後面」？

其實 hiai 高高在上 ê 音韻學者嘛是仝款，kahkī mh bad 寫 kah 一篇仔台語文，所研究 ê 其實是漢字 ê 問題，無切入台語書寫 ê 問題。

第三種人是一堆切實 ê 台語文工作者，kah 第一、二種人拄拄仔 nzyâh 做對比 ê 人，會用得佫再分做二個類群；其中一個類群 ê 人，不管三七二十一，若電腦拍會出來 êh 漢字攏 kah 伊提來用，管呔伊啥乜表意文字，講這是「台語漢字」，大膽 kah 漢語爭取漢字 ê 主導權。

下面是林央敏 ê 長篇小說『菩提想思經』( 3--火煙空滅品) 內 ê 一段，請參考：

客運車將欲 (ghiong<veh) 駛到石碇的半路，洶洶聽著後壁有觱 (bi) 仔聲催無停，逐 (dak) 個人客攏斡 (uat) 頭看，看著有兵仔車欲駛進前，因為山路阨 (eh)，阮這台客運車的運匠一時無位通閃，就繼續駛，使到一個斡彎的實在才停落來讓兵仔車先過，「駛怹娘咧，阿山仔兵歹銃銃(ching<)！」運匠罵一聲，頭斡出去看，拄仔兵仔車欲駛過，坐頭前正爿彼個看起來豬仔面豬仔面的軍官頭嘛探出來，夯一支手銃，對阮客運車的運匠若比若罵：「肏 (chau\) 媽里嘓屄 (bi)，死老百姓找死嚒？妨礙任務！」運匠趕緊給頭勼轉來，身軀頷 (aN<) 低，佳哉，嚇的爾，並無真正彈，兵仔車駛過去，不而過，當彼個豬仔軍官給手銃比過來的時，阮規台車的人攏驚一趒，佮運匠仝款頭隨趴落去，佳哉車是停的，若無，運匠一驚，航導履 (han/der-lu) 一偏，無定會傱 (jong/) 山壁或是墜落山谷。這個時陣，我已經智覺著情勢無單純，危險的喟絲仔愈湠愈厚，浞 (do<) 入鹿窟。

佫一類群 ê 人反倒返來，緊慎不敢超越現行中文 ê 用字範圍，dgh dirh「非漢要素」寫 būeh 出來 ê，dirh 改用中文 kah-i 連接起來，親像現時發行 ê 台語雜誌『台文戰線」嘛愈來喻「全漢字化」，dauhdauh'wa 行對「雙語文」ê 死巷入去。

下面抄一段胡民祥『探討六家台語政治小說』(台文戰線第 22 期) 來做見証：

一向母語文學是民族文學的自然得文學，母語忠於民族語言心靈奧底的秘密，這款秘密只母語的鎖匙才拍會開。歐洲各國的民族文學是按呢生，台灣民族文學嘛必然是按呢生。一抱台灣文學史是不時咧回歸母語文學的彎彎曲曲之史，嘛是台灣民族生存自我解放的縮影。外來殖民語參心靈定定是歹通線，所以，寫來往往是參心靈走精去，行唔著路去，誠簡單道去夆迷去，親像互魔神仔迷魂去，歹寫出民族心靈奧底之聲。

當然 dakke 攏是愛台語，為 dirh 台語 le 拍拼，kānnā 想法無仝，做法無仝 niahnyā。Mhkurh 過去 ê 經驗已經清楚 kāh 咱講 kānnā 漢字無夠 tāng 好用來表寫現代台語。

Dīh 前面『知死不知走』有講 dirh 中國學者郭沫若講：「中國話因為語同音字太多無適合改用羅馬字，不是不知影羅馬比漢字卡好用」(1980) ，其實 ia 佫有一個理由，dirh 是漢字 dīh 中國 ê 歷史悠久，改用羅馬字工程大 kah 卡大天。Zid 個理由套 dùah 日本語文嘛會通，因為安呢，漢字文化圈事實上已經崩潰無存在 ê kīn’nalit，原在繼續 le 用漢字，不敢改用併音文字，嘛是因為漢字 dīh 日本語文至少有規千年 ê 包袱，改用併音文字 ê 工程太大，ziah ēh 不敢放 sak 漢字。不過嘛一直 le kā 使用 ê 漢字減 hō 卡少。

仝款對漢字有一千年以上包袱 ê 朝鮮語文 kah 越南語文都攏決心放 sak 漢字 ê 枷，改用併音文字啦。倒返來看咱 kahkī，台語文其實是新 ê 物件，準講有 kua’a 卡早 ê 人用漢文寫作 ê 詩、賦，其實一點點仔 niahnyā，無多，佫嘛真歹算做台語文學 ê 一部分。Dirh 是講：漢字文化圈 iabūeh 崩潰以前台語文 iabūeh cudsì，無漢字 ê 包袱。朝鮮語 uih 世宗皇帝制訂雁文字以來，拼六百年 ziah 脫漢字成功；越南文靠西方殖民 ê 衝擊 ziah 脫漢字成功。Lângh bùn dōle bùnh būeh 出來，咱 mh-tāng 無枷 le gîah 門扇板，台語文 ziah ēh-dàng 成功發展起來！

有一擺 dīh 一個研討會場 ê 私下閒談中間言起台語文字化 ê 問題，《台灣七色記》ê 作者姚嘉文先生講：「仝一個國家內底哪會用得用無仝款 ê 字？」險險仔引起一場爭論。問題 dirh 出 dīh zia，咁講原住民 ê 南島語嘛仝款愛用漢字，būeh 用得用表音文字來寫？Kānnā 看日本語文採用漢字 lām KANA(假名) kah HIRAGANA(平假名) 三種文字，過去 ê 朝鮮語文用漢字 lām HANGLE (雁文)，越南語文採用漢字 lām 喃字，古早 ê 西夏語文採用漢字 lāmh 西夏龍字；台語文採用啥乜款文體卡適當，大概你嘛想會出來。