台語文學評論-有尊嚴e語言

。

有尊嚴 ê 語言

。

「語言」帶 dirh 多層性，dirh 是因為社會階級 êh 差異所形成 êh 語言差異。反過來講：語言 êh差異也會形成社會階級 êh 差異。Dīh 台灣，因為推行「國語」政策，kāh 北京語塑造 nzyâh-做文化 êh 語言，因為安呢，使用北京語 êh 人嘛 hông 塑造 nzyâh-做卡 kûanh 階層 êh 人；相對使用母語 êh 人變成低層社會 êh 人。這種觀念煞 hōh 本來不是北京語族學會曉講北京語 êh 人，無願意回頭使用 kahkī êh 母語。這顯然不是語言本身 êh 社會功能出問題，是一種人性 êh 弱點──響往「威權」(prestige) êh 心理 le 作怪。

語言學者 bad 做過一項測驗，由 kûan 到低，分做五個階層來測定人對「威權」需求 êh 強烈度，發現中流下層附近 êh 人最強烈。最下層 êh 人，對語言 êh「威權」ia 無「威權」？若 kah kahkī êh 職業無關係 êh，不是關心 êh 所在。最上層 êh 人對自己 êh 生活、收入 kah 地位，本來dirh 感覺相當有「威權」kah 滿足，對「威權」需求 êh 強烈度比較卡緩和。

事實上，dīh 台灣，最低層 êh 人 êh 追求「威權」，希望脫離「微賤」，出頭天 êh 欲望，比中產以上階層 êh 人 ya 佫卡強烈。

所以，某語言會滅亡，不是 hid 個語言本身有啥乜不得了êh 缺憾 ia 弱點；也不是外來殖民政權真正有若大 êh 能耐，是使用族群 kahkī 對別語言感覺 dirh 有卡 kûan êh「威權」，對使用 kahkī êh 母語感覺 dirh 自卑 kah 見羞，ziah 會致使 kah kahkī êh 母語行向滅亡 êh 路。

雖然這是 hōh 人塑造 êh 一種觀念，是幻想 êh，不是真 êe ，mhkurh，人向 kûan veh，這是無法阻擋 êh 人性，空嘴叫大家愛用母語，無啥乜說服力。中國人有一句成語講：「山不轉人轉」，做好文字化工程，hōh 台語 nzyâh-做有威權、有尊嚴 êh 語言，趨勢 dirh 會逆轉。

咏時強迫東歐猶太人同化 êh 理由：認為猶太語不是獨自 êh 固有語言，是一種粗俗 êh 日耳曼語。為 dirh zid 個原因，伊色列人照計劃，將尹 êh 語言建造做 kahkī êh「固有 êh 語言」，經過一可仔作家 êh 努力，最後成功 nzyâh-做文學 êh 語言，嘛 nzyâh-做尹 kahkī 固有 êh 語言。伊色列人會，咱嘛會！