台語文學評論-評論

講東講西講南北

2009 年我 êh 創作小說〈烏色 ê 日頭〉入圍台灣文學館台灣文學獎。我一半失望一半歡喜，失望 êh 是 kānnā 入選無得獎；歡喜 êh 是得獎 êh 是中生代 êh 青年人。若是親像我此 lūr 七老八老 êh 得獎，我 êh 失望一定會比無得獎佫卡大，因為這 dirh 表示台語文學是一條 zatd-路，是一條孤單佫虛微 êh 路。

經過半年了後，我開始後悔起來，後悔去參選彼擺文學獎，因為我看了所有入選 ê 作品了後，對評選 êh 角度 kah 標準有 zidsud’la 意見，mh kurh 家己叨去參加了，嗛采仔 hōh 人誤解 kong 無得獎 suah le būeh qad 得，煞無講話 êh 立場。

Hām 幾個仔關心台語 êh 朋友提起我心內 êh 代志，尹攏鼓勵我講：「無要緊啊！若是對事無對人，為 dirh 台語 êh 早日復權，dirh 免罣慮 hiah 多，mh kānnā ēh iōngh did 提出來討論，kurh 卡應該大聲講出來」。朋友 ê 鼓勵拄仔親像布袋戲 ê 口白「死道友，無死貧道」。好啦！既然「道友」beh 做，皮 dirh nvyī 死卡 ân 咧！

寫小說不是我 êh 能耐，雖然 dīh 少年時也讀過幾苞仔世界有名 êh 文學，親像：《レ • ミゼラブル》、《魚》、《サックル•エル•パール》kah Dostoevsky êh《散赤 êh 人》；讀過施耐庵 êh 《水滸傳》kah 吳承恩 êh《西遊記》；看過電影〈紅菱豔〉、〈鐘樓怪人〉、〈腳踏車賊〉kah〈情婦 Malon〉(中譯：獨留青塚向黃沙)，感動 kah baksái na 流，總是想 kong 看戲 êh 總比做戲 êh 卡輕鬆，mh bad 想 kong beh 寫啥乜文學。

1998 年 7 月我出版過一本『玉蘭花』台語文學集，是為 dirh beh 實驗看我編著 êh《台語漢字四用字源》所收輯 êh 字眼，咁有夠系統化？有夠 tāng 用來寫卡長 ê 台語文章所寫 ê niahnyā 。後來也烏白寫過一 qua’a 台語作品，以至 kah 參選 êh 〈烏色 ê 日頭〉，根本上攏當做是母語復權運動 ê 延續，希望建立文字化 êh 一個 qāngqì niahnyā，無自覺到文學性 ê 問題，嘛無能耐 tāng 顧到 zid 個問題。

Dīh zia，不是 beh 講啥乜人 êh 作品卡好，啥乜人 êh 作品卡無好 êh 問題；是 beh 來講關係一般文類 ê 書寫美學 ê 問題，dirh 是關係用詞 ê 問題 niahnyā。林央敏 dīh 2011年『台語散文金典獎決審會議記錄』中也講：「台語散文獎我所在意 êh 有三點，一是語言，作品是不是用台語寫 êh，二是作品是不台語散文，最後再看文學性，文學內函如何…」。既然台語文學獎是對台語文學創作 êh 一種鼓勵，現時段，為 dirh 提升用詞，對作品 êh 評審應該 kah 詞彙方面 êh 講究囥代先，故事情節 kah 文 êh 結構會用得暫時囥蹛後面。當然，若是三點攏好 êh 作品是上好 êh。

本土語言長久受政治暴力 êh 壓迫，詞彙 êh 遺失 kah 文法 êh 錯亂相當嚴重，雖然「嘴講台語，手寫台語文」已經 fuah 二十外年 ā，其實 dīh zid 個 qamzām，ya 是 dīh le 修復(maintenance) êh 階段，ya būe 用得用平常 êh 標準來比評台語文。若會 dàngh 且 kā「文學內函」zid 個層次囥第二，「語文」êh 層次做為優先比評 êh 條件，對台語 êh 復權工作，一定會產生一種誘因 kah 功效。其實有豐富 kurh 優美 ê 用詞，「內函」自然 dirh 會 zadsit 起來，「文學性」也會提 kûan 起來，好 êh 文學一定愛有豐富 kurh 優美 êh 詞彙。當然是用台語寫 êh ziah 是「台語文學」，ze 是先決條件。

討論台語 êh 書寫問題，到 nda 都攏欠一個溝通 êh 平台 hām 誠意。攏是一kuah’a 相褒相 lur，無dirh 互相詈罵攻擊，無批評 kah 反省 êh 能量。無發言台 êh 人，上好 kahkīh dìngh 做一個 sabbûnh-箱仔，準備 hông lîrh 做三四片 ia 是四五片，看 beh 搵豆油 ia 是 beh 搵 wasabih，都攏由在你！

Gun 故鄉 êh 園 ni 有一種大天蛾叫做 “gûhyaf ”，意思是親像牛 hiahnii 大隻 ê yafh’a。天蛾 ê 蛹虫叫做 “ziuvân”，因為伊 ê 形體 kahna 古早時仔拜拜 êh 時 le 奠水酒 êh 「酒瓶」；不是吊 dīh 草枝 ia 是樹仔枝頂，是 bih 踮 dīh 土底；若 kah-i ó 出來囥 ni 土腳兜，dirh pud-pud 跳，kūrh-來 kūrh-去，一打頃仔 kíi 東西，一打頃仔 kíi 南北，因為安呢，Gun 故鄉 êh 人 kāh-i 叫做「東西南北」。